अंदूं सायें नुस्तें उत्पादनाचो विक्रम

भांगरभूंय | प्रतिनिधी

पणजी : गोंयांत 2024-25 तलें सायां उदकांतल्या नुस्त्याचें उत्पादन 8684 टन जालां. हें फाटल्या स वर्सांतलें विक्रमी उत्पादन थारलां. पोरूंचे तुळेंत सायां उदकांतल्या नुस्त्यांचें उत्पादन वाडलां. अंदूं शेवटे, सुंगटां आनी मुड्डोशीच्या उत्पादनांत वाड जाल्या. तिसऱ्यो, चोणाकाचें उत्पादन मात्शें देंवला. 2024-25 ची आंकडेवारी ही तात्पुरत्या स्वरुपाची आशिल्ल्यान वट्ट उत्पादनांत आनीक वाड जावपाची शक्यताय आसा, अशें नुस्तेमारी खात्यांतल्या अधिकाऱ्यांनी सांगलें.

मेळिल्ले म्हायती प्रमाण 2019-20 ते 2024-25 मेरेन सायां उदकांतल्या नुस्त्यांच्या उत्पादनांत दर वर्सा वाड जाता. 2019-20 त नुस्तें उत्पादन 4081 टन आशिल्लें. 2020-21 त 5325 टन आशिल्लें. 2022-23 त सायां नुस्त्यांचें वट्ट उत्पादन 6308 टन आशिल्लें. 2023-24 त तातूंत 2090 टनांची वाड जावन तें 8651 टन जालें. जाल्यार 2024-25 त तें 8684 टन जालें. 2023-24 त ल्हान, मध्यम आनी व्हड आकाराच्या सुंगटांचें 1384 टन उत्पादन जाल्लें. 2024-25 त तें वाडून 2278 टन जालें. ते भायर 2023-24 त शेवट्यांचें उत्पादन 797 टन आशिल्लें. 2024-25 त तें 830 टन जालें. 2023-24 त मुड्डोशीचें उत्पादन 153 टन आशिल्लें. 2024-25 त तें 223 टन जालें. केर नुस्ताचें उत्पादन एका वर्सांत 6 टनांनी वाडून 60 टन जालें. 2023-24 त चोणाक उत्पादन 244 टन आशिल्लें. 2024-25 त तातूंत 43 टनांचो उणाव जावन तें 202 टन जालें. 2023-24 त तिसऱ्यांचें उत्पादन 866 टन आशिल्लें, जाल्यार 2024-25 त तें 564 टन जालें.

काळुंदरां, कुल्ल्याचें उत्पादन देंवलें

मेळिल्ले म्हायती प्रमाण पोरूंचे तुळेंत अंदूं सायां उदकांतलीं काळुंदरां आनी कुल्ल्यांचें उत्पादन देंवलें. 2023-24 त कुल्ल्यांचें उत्पादन 791 टन आशिल्लें. 2024-25 त तें देंवून 672 टन जालें. 2023 त काळुंदरांचें उत्पादन 842 टन आशिल्लें. 2024-25 त तें 684 टन जालें.