इंटरनेट आनी कोंकणी ध्यास

भांगरभूंय | प्रतिनिधी

पुणून इंटरनेटा वयल्यान कोंकणी भाशेचें प्रसारण, प्रचारण करपी लोकांकय योग्य अशी प्रसिद्धी आनी उर्बा दिवपाक आमी तांच्या वावराची नोंद ही घेवपाकच जाय.

अयोध्येचें राम मंदीर जायत सावन रामनामाचीं भजनां आनी वेग- वेगळीं रुपकां सगळ्या भारतीय भाशांनी इंटरनेटाचेर यू- ट्यूबाचेर नवीं- नवीं येवपाक लागलीं आनी कोंकणी भाशेंत मात एक देखीक सादें रामभक्ती गितूय ना अशें म्हाका म्हज्या पुतान म्हणलें. आनी हांवें पळयलें. खरेंच कांयच ना! लजशी दिसली. अश्यो खूबश्यो गजाली आमचे कडेन येवपाक जाय, आसपाक जाय हाची खंत म्हाका कोंकणी चळवळींतले मनीस म्हूण आसताच हातूंत दुबाव ना, पुणून, जंय आमी मार्ग सोदूंक शकता, आपलो म्हणून ल्हानसो चानयेचो वांटो उबारूंक शकता जाल्यार तो आपणे अवश्य करचो अशें म्हजें अंतर्मन म्हाका सांगपाक लागलें.

दुसरे वटेन हांव चडांत – चड रामाचीं भक्तीगितां गावन ध्वनीमुद्रीत करूंक शकतां. मुखार तीं लोकां मेरेन पावोवपाकय म्हाकाच धडपडचें पडटलें. हें चिंतून तातूंत वाजसो आयलो म्हणून, हांवें चल्याक सांगलें, “बाबा पदां हांव रोखडींच करतां, पुणून तीं करून मुखार कितें? सगळ्या लोकां मेरेन पावतलीं कशीं?”

तरणी पिळगी डिजिटल वर्ल्डांतली. ताणें रोखडेंच सांगलें यू- ट्यूब, स्पोटीफाय आनी खूब कितें आसा. इंटरनेटाचेर इतलेंच न्हय कोंकणी समाजा कडेन पावोवपा खातीर कोंकणी वॅबसायट ‘ध्यास कोंकणी’ (www.dhyaskonkani.com) आसा, ताचेरय आमी घालुया म्हणटकच सगळ्या मेरेन पावतलीं.  ध्यास कोंकणी हे वॅबसायटी विशीं समजलें तेन्ना म्हाका खूब बरें दिसलें. म्हणून आयज खूब कितें मनांतलो ध्यास खूब तेंपान काय जायना, तो व्यक्त करप अशें थारायलें आनी हो लेख बरोवपाक घेतलो. 

आयज आमी कोंकणी उलोवंक येना, व्याकरणशुद्ध बरोवंक येना वा कोंकणींतल्यान वेव्हार करपाक जमना म्हणून नवे पिळगेक दोश दिवपाची संद सोडिनात. पुणून, तीं करतात त्या वावराकय तोखेवपाक जाय. तांकां प्रोत्साहन दिवपाक आमी नव्या डिजिटल संवसारा कडेन इश्टागत करपाक जाय. आनी तांकां योग्य रितीन वाटचाल करपाक मदतय करपाक जाय. हाची खूब तिव्रतायेन जाणीव जाली होय लेख बरोवपा फाटलो उद्देश.

हेर भारतीय भाशांनी खूब व्हडली भरारी घेतल्या कारण तांचो आवाठ खूब व्हडलो आसा. त्या मानान कोंकणी भास खंयच फाटीं ना. पुणून, योग्य रितीन मुखार वचपाक सोदतल्याक लेगीत ताची वाट सोंपी जावपाक आयज मदत करपाची गरज आसा. ते नदरेंतल्यान इंटरनेटाचो आदार कसो घेवप हें आमकां कळपाची लेगीत गरज आसा.

कोंकणी चळवळीन वावुरलें, कोंकणी राजभास जाली, गोंयाक घटक राज्याचो दर्जो मेळ्ळो, कोंकणी आठवे वळेरेंतय गेली. हें सगळें आमच्या दोळ्यां सामकार एक- एक करून सरकारी पातळेर घडत गेलें. आनी आमकां सगळ्यांक मना पसून दिसलें, आमी आतां जिखली. फुडलो वावर जो आसा तो कोंकणी शासकीय पातळीचेर चालीक लावपाचो. तो आपसुकूच जायत रावतलो अशें दिशिल्लें. तें तशें दिसप इतलें सोंपें न्हयच न्हय! आमची खरी कसवटी आतां लागू जाल्या आनी ती आमी जीव ओंतून तडीक व्हरपाची गरज आसा. ते खातीर नवी पिळगी जो- जो वावर कोंकणीचे उदरगती खातीर करूंक सोदता वा करता तांकां आमी योग्य मदत करुया, आपले परीन मार्गदर्शन करुया. 

आमी साहित्य, संगीत वा हेर कले खातीर माची उक्ती दवरतात. साबार कार्यावळी जातात तांकां आपलें नांवलौकीक जावपाक अशे रितीन बरे पैकीं संद मेळटा. पुणून इंटरनेटा वयल्यान कोंकणी भाशेचें प्रसारण, प्रचारण करपी लोकांकय योग्य अशी प्रसिद्धी आनी उर्बा दिवपाक आमी तांच्या वावराची नोंद ही घेवपाकच जाय.

आयज फेसबूक, इन्स्टाग्राम सारकीं माध्यमां उक्तीं करून फकत कोंकणी हें उतर बरयलें जाल्यार कोंकणीचो वावर करपी सहज कितलींशींच पानां आमकां नदरेक येतात. कोंकणी गितांचे, कांतारांचे व्हिडियो, फूड- ब्लाॅग (जेवणां- खाणांचे व्हिडियो), तशेंच कोंकणी रिल्स लेगीत आतां खूब येवपाक लागल्यात. कोंकणी फकत गोंयां पुरती न्हय, तर साबार कोंकणी जन थंय मेळटात. देश-विदेशांत कोंकणी मनीस जे स्थायीक जाल्यात, ते आपले कोंकणी प्रेम वेग- वेगळे रितीन परगटायतात.

सगळ्यो गजाली खूब बारीकसाणेन पळोवपाक हांव पावंक ना पुणून konkani.in नांवाच्या पानाक लागीं- लागीं धा हजार फॉलोवर आसात. रोमन लिपयेंतच कारवारी कोंकणी ह्या पानार वाचूंक मेळटा. नित्य वेव्हाराच्यो सगळ्यो गजाली बाकी धरून हेर क्षेत्रांतल्यो गजाली थंय वाचपाक मेळटात. म्हत्वाचो मुद्दो म्हणल्यार कोंकणीचो आंवाठ आमी समजून घेवन ह्या डिजीटल माध्यमाकय आपलें करून तरनाट्यांक विश्वास दिवपाची गरज आसा. कोंकणी वाचप, कोंकणी बरोवप वा कोंकणी कार्यक्रम घडोवन हाडप, कोंकणी कार्यावळीक हजेरी लावप, इतलीच मर्यादीत ही कोंकणी न्हय!

मूळ मुद्द्याचेर येतना ध्यास- कोंकणी नांवाची कोंकणी वॅबसायट कोंकणी भाशेच्या सर्वांगीण विकासा खातीर वावुरता. म्हजीं रामगितां थंय अपलोड करतना थोडेशे बारीकसाणेन हांवें पारखून घेतलें. तातूंत भितर नवी युवा पिळगी वेग- वेगळ्या विशयांचेर बरोवन आपलें योगदान दितात. कोणाकच एक पयशाची आस्त ना वा हांगा दुडू दिवपा – घेवपाचो वेव्हारय ना. ही वॅबसायट चलोवपी तरनाट्यो चलयो – चले वयल्यान आपले भितर वर्गणी काडून ही वॅबसायट चलयतात. मना पसून अपुरबाय दिसली. हे वॅबसायटीचेर सर्फींग करतल्यांक मुद्दाम सांगीन दिसता, साबार तरेन कोंकणी मनशाक गिन्यान मेळटलें आनी तांकां जाय आशिल्ल्या विशयाचेर गरज आसा तें शिकपाकय मेळटलें. 

सुविचार, कविता, परबीं भेटोवपाचे नमुने, लग्नपत्रिका, मुंजीच्यो, घर प्रवेशाचीं आमंत्रणां हे वॅबसायटीचेर पळोवंक मेळ्ळीं. इतलेंच न्हय तर कोंकणीचें व्याकरण धरून भुरग्यांक लागता तें शिक्षणीक साहित्य, म्हणी, लग्नगितां, होंवयो अश्योय लोकवेदाचे परंपरेक धरून कांय गजाली पळोवपाक मेळ्ळ्यो. त्या भायर निबंद सर्ती आयोजन करून भाग घेवपी सर्तकांचे निबंद खूब सुंदर रितीन मांडिल्ले वाचपाक मेळ्ळे. हो वावर तसो सादो न्हय! पुणून तो सातत्यान आनी जिद्दीन चालू आसा, हें पळोवन मन भरून आयलें.

आमी पुस्तकां छापतात, ताचें विमोचन करतात, मागीर तीं विकतात आनी साबार कडेन तीं पावतात. आमी कोंकणी भाशणां करतात, साबार जमिल्ले लोक तीं आयकतात अशे खंयचे ना खंयचे पद्दतीन प्रसिद्धी मेळटाच मेळटा. खंय तरी समाधान जाता पुणून असो संशोधनात्मक पातळेचेर ऑनलायन पद्दतीन कोंकणी भास सगळ्यांच्या मनांत आनी जनांत पावची म्हणून यत्न करपी मनीस खूब तिव्रतायेन कोंकणीचो प्रसार, प्रचार करता. ताका आपलो खाशेलो वेळ दिता. ह्या वावराक कोंकणी जनते कडल्यान, जना कडल्यान योग्य प्रतिसाद नक्कीच मेळपाक जाय अशें मना पासून दिसलें.

कोंकणी उलोवपाक, कोंकणी बरोवपाक, कोंकणींतल्यानच वेव्हार करपाची एक संवय लावन घेवपी उत्सुकांनी तर नक्कीच ‘ध्यास – कोंकणी’ ही वॅबसायट उक्ती करून पळोवची. तांकां हाचो खूब फायदो जातलो. खूब फावट इत्सा आसून लेगीत कोंकणीन बरोवपाक योग्य जायना म्हणून तीं मागीर इंग्लीश वा मराठी बरोवंक लागतात. तांकां योग्य उतरां वापरून बरोवपाची तांक नक्कीच येतली. ही वॅबसायट तळागाळांतल्या खूब लोकां मेरेन पावपाची गरज आसा.

आयज कांय तरनाटीं भुरगींय बी खूब कितें बरोवन ध्यास कोंकणी वॅबसायटी खातीर बरोवंक लागल्यांत आनी तीं आमचे कोंकणी साहित्यिकांनी वाचून ताका थोडीशी उमेद दिवपाची गरज आसा. फकत कोंकणी- कोंकणी म्हणचे परस आमी डिजिटल संवसारांत कोंकणी कशी प्रस्थापीत करतले हाचेर खूब भर दिवपाची आयज गरज भासल्या. काळा प्रमाणें आमी बदलत रावपाक फाटीं पडूंक जायना. जैत जाय जाल्यार दुस्मानांचे पसून गूण पारखूंक आमी कोंकणी लोकांनी शिकपाची गरज आसा. आमी आमच्याच लोकांच्यो कुरापती काडत बसप न्ही. 

कोंकणी भाशेची तुळा इंटरनेटचेर जेन्ना आमी मराठी कडेन, हिन्दी कडेन वा हेर भाशां कडेन करतात, तेन्ना आमी खंय आसात आनी आमकां खंय वचपाची गरज आसा हाची जाणविकाय येवंक लागतली…. आनी एकामेकांच्या सहकार्यान आमी प्रसार करपाची गरज आशिल्ल्यो आमच्यो म्हत्वाच्यो कांय गजाली आमकां समजतल्यो. सरकारी पातळेर कोंकणीची अंमलबजावणी जातली जाल्यार आमी आमचे भितर पयलीं कोंकणीच्या व्याकरणाक- प्रमाण लेखनाक आनी कोंकणी बरोवपी नवोदितांक आदार दिवपाची गरज आसा.

आमकां खूब समजता आनी भुरग्यांक कांय कळना, खूब चुकी करतात अश्यो कागाळी करचे परस, प्रत्येक फावटी तांकां बरेपणान योग्य वळण लावपा खातीर आमी अशा वावराक आमचो आदार दिवप हे खूब म्हत्वाचें आनी गरजेचें.

ध्यास-कोंकणी ही कोंकणी भाशेच्या प्रबोदना खातीर चलपी वॅबसायट. गोंयच्या सगल्या मुखेल कोंकणी संस्थांनी लेगीत योग्य रितीन वॅबसायटीक आनी अशा उपक्रमांक प्रसिद्धी आनी आदार दिवंक जाय. म्हणटकच ह्या वावराक आनीक बळकटी येतली अशें म्हाका दिसता. डिजिटल युगाचो आदार घेवन कोंकणी संवसारीक पांवड्यार पावपाचो हो वावर असोच चलचो. नवे पिळगेचेर विश्वास दवरुया, तांकां आदार दिवया आनी कोंकणीची घुडी तांच्या हातांत सुरक्षीत आसा हाचें समाधान मानुया.

– डॉ. शकुंतला भरणे

88884 07911