भांगरभूंय | प्रतिनिधी
मुंबय: नुस्तें कापल्यार घाण जाता, दुर्गंध येता, देखून हाचे फुडें नुस्तें कापून वा नितळ करून विकचें न्हय, तर तें आख्खेंच विकचें, अशी सक्ती मुंबय महानगरपालिकेच्या अधिकाऱ्यांनी वाकोल्यांतल्या (धोबीघांट) नुस्तेंकार बायलांक केल्या. पालिकेच्या ह्या निर्णयाक लागून नुस्तें विकपी बायलां मदीं आनी पुराय खारवी समाजांत तिडक पातळ्ळ्या. आदेश पाळ्ळो ना जाल्यार खर कारवाय करपाची शिटकावणी पालिकेन दिल्या.
राजकी पडसाद आनी दुबाव
शिवसेनेच्या ठाकरे गटान पालिकेच्या ह्या निर्णयाक खर विरोध केला. ह्या निर्णया फाटल्यान नुस्तें न खावपी बिगर-हिंदू समाजाचे चेपण आसूं येता, असो दुबाव कांय जाणांनी उक्तेंपणान उक्तायला.
धंद्यार जालो वायट परिणाम
“नुस्तें कापून आनी नितळ करून दिलें ना जाल्यार कितलीं तरी गिरायक तें विकत घेवचीं नात. हाचो थेट परिणाम आमच्या धंद्याचेर जातलो. आमचो संवसार ह्याच वेवसायाचेर चलता आनी पालिका अधिकारी आमच्या पोटाचेर पांय दिवपाचो यत्न करतात,” अशें नुस्तें विकपी बायलांनी सांगलें.
‘कोंबयो कापपाचेरुय बंदी घालात’
नुस्तें विकपी बायलांनी पालिकेच्या ह्या अन्यायी निर्णया आड आवाज काडला. “जर नुस्तें कापल्यार घाण, बुरशेंपणा जाता, तर कोंबयो विकप्यांकूय तशेंच सांगात. कोंबयो कापून घाण जायना काय” असो प्रश्न तांणी विचारलो.
वाकोल्यांत कितें घडलें?
वाकोला धोबीघांट वाठारांत नुस्तेंकार बायलो नुस्तें विकपाचें काम करतात. चड करून गिरायक नुस्तें विकत घेतल्या उपरांत तें थंयच कापून वा नितळ करून मागतात. पूण, ताका लागून जागो बुरसो जाता, अशें कारण सांगून महानगरपालिका अधिकाऱ्यांनी थंय नुस्तें कापपाक सक्तीची मनाय केल्या. फाटले 3-4 दीस हो बोवाळ चल्ला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
