भांगरभूंय | प्रतिनिधी
पणजीः कारापूर- सर्वणांत येवपी 1700 वयर घरांच्या गृह निर्माण बांदकाम प्रकल्पांत संबंदी पंचायत प्रतिनिधी आनी अधिकारी, कोमुनिदाद अधिकाऱ्यांनी अनियमितताय केल्या. हाची खोलायेन चवकशी करची अशी मागणी थळाव्यांनी केल्या. हे विशीं बिरेस्तारा थळाव्यांनी पंचायत संचालकांक कागाळ केली. प्रकल्पाचें काम थांबोवपाक हस्तक्षेप करप, सरपंच, उपसरपंच आनी पंचायत सचीव हांचे आड चवकशी करुन कारवाय करप, अश्यो धा वेगवेगळ्यो मागण्यो ह्या वेळार केल्ल्यो. मागणी मान्य जाल्यो ना जाल्यार आझाद मैदानाचेर आंदोलन करपाची शिटकावणी ह्या वेळार दिली.
हे संबंदी डॉ. स्वप्नील सालेलकार हांणी सांगलें, फाटले 33 दीस आमी आंदोलन करतात. आयज आमी खात्याच्या संचालकांक पंचायत राज कायदो, 1994 खाला काम करनाशिल्ल्या सरपंच, उपसरपंच सचीवांचेर ग्रामसभा थाराव दाबून दवरप, भ्रश्टाचार करप, बेकायदेशीर परवाने दिवप, अधिकारांचो गैरवापर करप अशा प्रकरणांत कारवाय करपाची मागणी केल्या. आदल्या सरपंचान राजिनामो दिल्या उपरांत सध्या आयशा बी हांचे कडेन ताबो आसा. पूण ग्रामसभेचें काम बंद करपाच्या थारावाचेर ती सय करना. पंचायत सचीवूय सुटयेर आसा. एकूणच ही प्रक्रिया कळाव जावपाक लागल्या.
सय करपी लोक गायब
आमची ग्रामसभा 19 एप्रीलाक जाल्ली. ते उपरांत 28 एप्रीलाक काम थांबवपाची काडिल्ली नोटीस योग्य पद्धतीन ड्राफ्ट करुंक नाशिल्ली. हाका लागून आमी तांकां ताचो योग्य ड्राफ्ट तयार करुन दिल्लो. पूण ताचेर सय करपी लोक सध्या गायब जाल्ल्यात. हाचे भायर कोमुनिदादीच्या जमनींतल्यान ह्या प्रकल्पा खातीर बेकायदेशीर रितीन रस्तो दिवपाची वेवस्था केल्या. ग्रामसभेंत 17 मुद्द्यांवेल्यान 5 थाराव संमत जाले. प्रकल्पाक नोटीस दितना ह्या मुद्द्यांचो आनी थारावांचो उल्लेख करचो अशी मागणी आमी केल्या अशें सालेलकार हांणी सांगलें.
आमदार वीरेश बोरकार हांणी म्हणलें, फाटल्या कांय वर्सांत भाजपा सरकार गोंयांतलें पर्यावरण नश्ट करपाचो यत्न करता. दोंगर, झाडां कापून, जमनीचें रुपांतर करून मेगा हावसिंग प्रकल्पांक परवानगी दितात. हाचे आड सगळ्या गोंयकारांनी एकठांय येवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
