भांगरभूंय | प्रतिनिधी
नवी दिल्ली: राष्ट्रीय गुन्यांव नोंदणी ब्युरोन (एनसीआरबी) 2024 वर्साचो गुन्यांवांचो अहवाल जाहीर केला. ते प्रमाण देशांतल्या वट्ट गुन्यांवांत 6 टक्क्यांनी उणाव जालं. पूण राजधानी दिल्लींत बायलां आनी जाण्ट्यां नागरिकांच्या सुरक्षेचो प्रस्न अजूनय हुस्क्याचो विशय आसा. मेट्रो शारां मदीं बायलां आडच्या गुन्यांवांत दिल्ली परतून पयल्या क्रमांकाचेर पावलो.
तमिळनाडूंत सुदारणा
अहवाला प्रमाण 2024 वर्सा मेट्रो शारां मदीं बायलां आडच्या गुन्यांवांत दिल्ली सगळ्यांत मुखार आसा. दिल्लींत 2024 वर्सा बायलां आड 13,396 गुन्यांव नोंद जाले, जे 2023 वर्सा 13,366 आशिल्ले. दुसरे वटेन, तमिळनाडूंत बायलां आडच्या गुन्यांवांत 1.5% उणाव जालो. देशांत बायलांचेर जावपी गुन्यांवांचो दर 2023 वर्सा 66.2 आशिल्लो, तो आतां 64.6 मेरेन देंवला.
जाण्ट्यां वयले गुन्यांव वाडले
देशभरांत जाण्ट्या नागरिकां वयल्या गुन्यांवांत 16.9% इतली चिंताजनक वाड जाल्या. 2024 वर्सा वट्ट 32,602 गुन्यांव नोंद जाले. दिल्लींत दर लाखा फाटल्यान 110 गुन्यांव नोंद जावन हें प्रमाण केंद्रशासित प्रदेशां मदीं सगल्यांत चड थारलां. राज्यां मदीं मध्य प्रदेश 5,875 गुन्यांवांच्या आंकड्यांत मुखार आसा.
सायबर: बेंगळुरू, मुंबय मुखार
देशांत सायबर गुन्यांवांत 17.9% ची वाड जाल्या. 2024 वर्सा वट्ट 1,01,928 गुन्यांव नोंद जाले.
एससी/ एसटी गुन्यांवांत उणाव
गोंयांत अत्याचार वाडले
आदल्या आकडेवारी प्रमाण, गोंयांत जुगाराच्या गुन्यांवांचें प्रमाण देशांत सगळ्यांत चड आसा. 2023 वर्सा जुगार कायद्या खाला 673 गुन्यांव नोंद जाल्ले. 2022 च्या अहवाला प्रमाण गोंय बलात्काराच्या प्रकरणांत वयर आसा. नोंद जाल्ल्या 75 प्रकरणां मदलीं 57 प्रकरणां (सुमार 76%) 18 वर्सां सकयल्या चलयां आड आशिल्लीं.
गोंयांत सायबर गुन्यांवांच्या तपासाची गती मंद आसा. सुमार 60% सायबर गुन्यांव अजूनय उक्ताडार येवंक नात.
एनसीआरबीचो हो अहवाल गोंयच्या पर्यटन, ड्रग्ज, सायबर गुन्यांव आनी रस्ते अपघातांच्या स्थितीचेर बारीक लक्ष दवरपाची गरज उक्तायता.
दिसाक 10 गुन्यांव
2026 वर्साचे सुरवेक उजवाडाक आयिल्ल्या पुलिसांच्या अहवाला प्रमाण, 2025 वर्सा गोंयांत गुन्यांवांचें प्रमाण भिरांकूळ रितीन वाडिल्लें दिसता. पोरूं दिसाक सरासरी 10 गुन्यांव नोंद जाले, जाचो वट्ट आंकडो 3,200 वयर आसा.
गोंय विधानसभेंत सादर केल्ले आंकडेवारी प्रमाण –
खून: वर्सभरांत खुनाच्यो 27 घडणुको घडल्यो.
बलात्कार: अधिकृत आंकडेवारी प्रमाण बलात्काराचीं 102 प्रकरणां नोंद जालीं. पूण, हेर कांय अहवालां प्रमाण हो आंकडो 163 इतलो आसा, जंय दुबावितांची वळख पटल्या आनी 212 जाणांक अटक जाल्या.
अपहरण: हुबारुन व्हरपाच्या प्रकरणांत व्हड वाड. पोरूं 103 प्रकरणांची नोंद जाली.
सायबर गुन्यांव: सायबर गुन्यांवांचें आंकड्यांत 65% इतली व्हड वाड जाल्या. 2025 वर्सा वट्ट 121 सायबर गुन्यांव नोंद जाले.
गुन्यांव सोडोवपाचें प्रमाण: पुलिसांनी दिल्ले म्हायती प्रमाण, 2025 वर्सा नोंद जाल्ल्या गुन्यांवांतले 88% गुन्यांव उक्तडार हाडपांत पुलिसांक येस आयलां.
#crime #crimeinindia #crimeingoa #goa #india #NCRB #delhi #mumbai #bengluru tamilnadu #NationalCrimeRecordsBureau
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
