भांगरभूंय | प्रतिनिधी
भांगरभूंय । प्रतिनिधी
पणजी: आसाम तशेंच अस्तंत बंगालांत भारतीय जनता पक्षाचे सरकार स्थापन जातलें. दोनूय राज्यांच्या सरकाराच्या सोपुत विधी सुवाळ्याक गोंयचे मुख्यमंत्री डॉ. प्रमोद सावंत हाजीर रावतलें. दोनूय राज्यांत जावपी सोपुत विधी सुवाळ्यांक हांव हाजीर रावतलो, अशें डॉ. सावंत हांणी सांगलें.
मंत्रिमंडळ बसके उपरांत उलयतना तांणी ही म्हायती दिली. विधानसभा वेंचणुकेंत भारतीय जनता पक्षाक व्हड प्रमाणांत येस मेळ्ळा. हाचे खातीर हांव प्रधानमंत्री नरेंद्र मोदी हांका परबीं दिता, अशेंय तांणी म्हणलें. अस्तंत बंगाल सरकारचो 9 तारखेक जाल्यार आसामच्या नव्या सरकारचो 12 मेयाक सोपुत विधी सुवाळो जावपाची शक्यता आसा.
भारतात लोकशाय आसा. वेंचणुके उपरांत हिंसाचाराच्यो घडणुको जावपाक जायना. राजकी पक्षान जनतेन दिल्ल्या कौलाचो आदर करपाक जाय, अशें अस्तंत बंगालात चंद्रनाथ रथ हांचे हत्येचेर उलयताना तांणी सांगलें.
ऑपरेशन सिंदूर विसरचे ना
भारतांत येवन घुसखोरांनी हिंदूंचेर फारफेट करून बायलांचो सिंदूर पुशिल्लो. हाचे उपरांत सैन दळान बदलो घेवन फारफेट करपी घुसखोरांक ठार केले. ह्या कारवायेक वर्स पुराय जाला. अशी घडणूक परत केन्नाच जावची ना. बायलांचो सिंदूर पुसलो वच्चो ना. वर्स जाले तरी सगळ्यांक ऑपरेशन सिंदूराची याद आसा, हाचे खातीर प्रधानमंत्र्यां सयत हेर फुडाऱ्यांनी समाज माध्यमावेले डीपी बदलल्या, अशें डॉ. सावंत हांणी सांगलें.
मांडवी न्हंयेत खयचेच स्थितींत आनीक कॅसिनो बोट येवची ना, अशेंय तांणी कॅसिनोचेर उलयताना सांगलें.
साकोर्डा वागाच्या मरणा विशीं सरकारान रानां खात्या कडेन अहवाल मागला. अहवाल आयले उपरांत हांव उलयतलो, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
