भांगरभूंय | प्रतिनिधी
वेवस्थापन, प्रशीक्षणा खातीर 1 कोटीचो निधी
भांगरभूंय । प्रतिनिधी
पणजी : तरेकवार वस्तू तशेंच अन्न प्रक्रीया केंद्रांचे वेवस्थापन आनी देखरेख करपा खातीर सरकारान गोंय लायवलीहूड फोरम एजन्सीक मान्यताय दिल्या. गरजेचें प्रशीक्षण तशेंच वेवस्थापना खातीर वर्साक 1 कोटीचो निधी एजन्सीक मेळटलो. मंत्रिमंडळ बसके उपरांत मुख्यमंत्री डॉ. प्रमोद सावंत हांणी ही म्हायती दिली.
मुख्यमंत्री डॉ. सावंत हांचे फुडारपणा खाला मंत्रालयांत मंत्रिमंडळाची बसका जाली. हे बसकेंत हो निर्णय जालो. राज्यांत 10 प्रक्रीया केंद्रां आसात. ही केंद्रां चलोवपाची जापसालदारकी आतां गोंय लायवलीहूड फोरम ह्या एजन्सीची आसतली.
सरकारी कर्मचाऱ्यांक म्हयन्याचो पगार तशेंच निवृत्त कर्मचाऱ्यांक वेळार पेन्शन दिवप शक्य जावचे म्हूण अत्याधुनिक सेवा दिवपा खातीर सरकारान इन्स्टेप सीनर्जीस प्रायव्हेट लिमिटेड ह्या एजन्सीची नेमणूक केल्या. ह्या एजन्सी कडेन सामंजस्य कबलात (एमओयू) करपाक मंत्रिमंडळान मान्यताय दिल्या.
सेजा रीसोर्सीस प्रायव्हेट लिमिटेड कंपनीक सरकारान धारबांदोडेंचो आलायतो 80 हजार मेट्रिक टन खण म्हाल हाताळपाक मान्यताय दिल्या. हाचे पयली कंपनीन 1 लाख 25 हजार मेट्रिक टन खण म्हाल पयलीच घेतिल्लो. आता आलायतो म्हाल हाताळपाक सरकारान मान्यताय दिल्या.
हे भायर गोंय पुनर्वसन मंडळांत तरेकवार 23 पदां तशेंच घरनिर्माण मंडळांत कनिश्ट अभियंत्यांची (सीव्हील) 2 पदां भरपाचो निर्णय मंत्रिमंडळान घेतला.
नामनेचे न्युरो सर्जन डॉ. पूनराज हांची निवृत्ती उपरांत गोंय वैजकी म्हाविद्यालयात सल्लागार म्हूण नेमणूक जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
