भांगरभूंय | प्रतिनिधी
हे असले प्रकार म्हणजे समाजांतल्या वाडट्या ध्रुवीकरणाचीं चिन्नां.
अामच्या भारतांत वाद फाल्त नात. चार दिसां पयलीं वाकोला (मुंबय) नुस्त्या बाजारांत वाद सुरू जालो. काल सांजवेळा म्हापौरान ताचेर पड्डो उडयलो, तें बरें जालें. कारण ताका राजकी दुर्गंध मारपाक लागिल्लो. वाद कितें तर बाजारांत घाण जाता म्हूण नुस्तें कापपाक बंदी. नुस्तेकार बायलो फुर्योज जाल्ल्यो. हालींसराक विस्वण सोडात, पूण बांगडे, ताल्ले पसून उजरावन व्हरपी गिरायकां वाडल्यांत. ‘नुस्तें कापून दिना जाल्यार धंदो बंद पडटलो,’ अशी भिरांत बायलांनी उक्तायिल्ली ती खरी. खुद्द म्हापौर रितू तावडे नुस्तें बाजारांत पावली आनी ‘पालिकेन तशी बंदी घालूंक ना, कांय राजकी गटांनी ती वावडी सोडल्या’, असो आरोप केलो. विरोधक ठाकरे सेनेचो दावो, ‘कोणे तरी तशें तोंडी सांगलां आसतलें.’ खरें म्हणल्यार नुस्तेकारांनी पालिकेंत वचून खात्री करुंक जाय आशिल्ली. पूण तीं तिडकलीं कित्याक, होय प्रस्न आसाच.
हालीं असहिश्णुताय वाडल्या. म्हाका जाय तेंच करचें पडटलें…. ही दादागिरी वाडल्या. फक्त मुंबयचीच न्हय, तर भोवतेक म्हानगरांनीय ती दिसता. दुसऱ्यांच्या मतांचो आदर जाय, नाजाल्यार लोकशाय तिगची ना. विवीधताय हीच भारताची वळख. तुमचो भेस, भाशा, धर्म, आहार वेगळो आसलो तरी तुमी दुस्मान जायनात. स्वातंत्र्य म्हणल्यार दादागिरी न्हय, तर एकचार. दुसऱ्याक ताचे पद्दतीन जगपाक दिवप. पयरूच बुद्ध पुनवेक बंगळुरुंत मास विक्री बंद दवरपाचो फतवो काडिल्लो. सण आसले काय मटण, नुस्तें विक्री बंद करपाची सक्ती जाता. कांय बिगरहिंदू समाज हातूंत इल्ले चडूच मुखार आसात. नितळसाणेक वा दुर्गंधीक लागून कोण तशी विनवणी करतात जाल्यार समजूं येता. पूण, ताचे फाटल्यान भलतेंच कारण आसता. हातूंत विक्रेत्या इतलोच पालिकेचोय दोश. कारण नितळसाणे कडेन लक्ष दिवप तांचेंय काम. कांय वर्सां पयलीं पणजे नुस्तें बाजारा लागसार गटारांत किडे दिसताले. नुस्तें, मासाचे बाजार म्हणल्यार बुरशेपणा, दुर्गंध अशें समीकरणूच जालां. ताका उपाय ना, अशें थोड्यांचें मत. तांणी सोशल मिडियाचेर विदेशांतले बाजार एकदां नदरे पोंदच्यान घालचे. कांय इमारतींनी फ्लॅट रिकामी जालें काय तें अमूक धर्माच्या व्यक्तीक दिवं नाकात, असो तोंडीच न्हय, तर लेखी फतवेय भायर सरपाचे प्रकार मुंबयंत घडल्यात. इमरान हाश्मीक पाली हील वाठारांत एके सोसायटीन तो मुस्लीम म्हूण फ्लॅट दिवपाक न्हयकार दिल्लो. आयजूय बिराडाक दवरतना, फ्लॅट विकतना धर्म, आहार, लग्न जाला काय ना, वेवसाय हाचे वयल्यान भेदभाव जाताच. फक्त कुटुंब, अमको धर्म नाका, फक्त शिवराक असल्योय अटी कानार पडटात. फुडाराक स्वताक समस्या निर्माण जावची न्हय, म्हूण थोडे तसो निर्णय घेतात. पूण समाजांत तेढ निर्माण जावची ना, हाची जतनायूय तांणी घेवपाक नाका? कबुतरांचो आंकडो वाडिल्ल्यान दुयेंसां पातळूं येतात, म्हूण तांकां खावंक उडोवं नाकात, असो निर्णय मुंबय जाल्लो. त्या वेळार कबुतराक देव मानपी समाजान व्हडलो बोवाळ केल्लो. ज्या कारणाक लागून विरोध जाता, तीं ना करपाचो यत्न दुसरे वटेनच्यानूय जावंक जाय. मुंबय नुस्तें कापतात, थंय हळशीक जावची ना, हाची जतनाय घेवप नुस्तेकारांची लागणूक.
हे असले प्रकार म्हणजे समाजांतल्या वाडट्या ध्रुवीकरणाचीं चिन्नां. ‘आमची संस्कृताय धोक्यांत आसा’, अशी भिरांत निर्माण जाल्या. राजकी प्रचार, सोशल मिडिया हाकाय लागून हे प्रकार खर जाल्यात. संविधाना प्रमाण, आमकां धर्म, आहार, वेवसाय, खंय रावप हें थारावपाचे अधिकार आसात. भौशीक भलायकी, हेर समाजांचे हक्क, कायद्याचो विचारूय दरेकल्यान करूंक जाय. अधिकार आसा म्हणटकच ते जाय तशे वापरूंक मेळनात…. आनी कोणे ते तशे वापरूंकय जायनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
