अस्तंत बंगालाचो परिणाम, तामिळनाडूंत तिसरो पर्याय, गोंयांत कितें?

भांगरभूंय | प्रतिनिधी

तामिळनाडूंत लोकांक भाजप तसो वळखीचो नाशिल्लोच. पूण ‘नारी शक्ती’क जावपी विरोध पळोवन तांणी स्टॅलीनाक घरा धाडलो.

अस्तंत बंगालांतल्या मतदारांनी भाजपाचेर ‘ममता’ दाखयतना थंय सत्ता बदल घडोवन हाडलो. थंयची ‘नारी शक्ती’, फाटल्या 15 वर्सां सावन राज्य चलोवपी ममता बॅनर्जीचो बालेकिल्लो निखळून उडयलो. हें जैत भाजपा खातीर खुबूच व्हड आसा. तशेंच आसामांत अपेक्षीत निकाल मेळोवन भाजपान आपली ताकद दाखयली. पुदुचेरींतूय भाजपान सत्ता राखली. आतां भाजपाचे फुडलें लक्ष आसतलें दक्षीण भारत. हे फावटी भाजपाक जरी दक्षीण भारत जिखपाक जमलें ना तरी प्रस्थापीत तामिळनाडूंत स्टॅलीनाचो गड उद्ध्वस्त जालो. केरळांत भाजपाचे कामगिरींत मात्शी सुदारणा जाली. फुडले खेपे जावपी वेंचणूक समांतर आसतली, हें ह्या वेंचणुकेच्या निकाला वेल्यान दिसून आयलें.
अस्तंत बंगालांत जैत जोडले उपरांत भाजपाचेर कितें परिणाम जातलो, हें पळोवया. ह्या जैतान भाजप आनी एनडीए शासीत राज्यां आनी केंद्र शासीत प्रदेशांचो आंकडो 21चेर पावलो. झारखंड सोडत जाल्यार उत्तर, अस्तंत भारतांत तांचीच सत्ता आसा. ईशान्य भारतांत मिझोराम सोडत जाल्यार हेर कडेन थळाव्या पक्षां वांगडा युती करून भाजप सत्तेंत आसा. तशेंच आतां नव्या राज्यांत जैत जोडिल्ल्यान राज्यसभेंतलो तांचो आंकडो वाडपाची शक्यताय आसा. अस्तंत बंगाल जिखिल्ल्यान भाजपाची ताकद आतां दुपेटीन वाडटली.
हे वेंचणुकेंत अस्तंत बंगालाची मुख्यमंत्री ममता बॅनर्जी आनी तामिळनाडूचे मुख्यमंत्री के स्टॅलीन हारले. दोगूय हारिल्ल्यान आतां त्या-त्या राज्यांतले विधानसभेंत हे दोन व्हड चेरे दिसचे नात. तशेंच, ह्या फुडाऱ्यांक हारोवपाक शकता हें दिसून आयले उपरांत त्या-त्या राज्यांतल्या भाजप कार्यकर्त्यांक फुडाऱ्यांक फुडें काम करपाक आनीक नेट येतलो. तशेंच, सध्याचे स्थितींत भाजपाक हारोवप कठीण आसा, हाचेरूय म्होर बसल्याच.
तामिळनाडूंत अभिनेतो विजय मुख्यमंत्री जावपा खातीर यत्न करता. काँग्रेसीन तेंको दिलो तरी ताका जाय तो आंकडो भरना. थंयचे राज्यपाल राजेंद्र आर्लेकार हांणी हें कारण दिवन तांकां तळमळत दवरला. स्टॅलीनाच्या पक्षान विजयाक तेंकों दिवंक ना म्हूण विरोधक बेजार आसात. भाजपाक पयस दवरपा खातीर सगल्यांनी एकठांय येवचें अशें काँग्रेसीक दिसता. सध्या थंय त्रिशंकू परिस्थिती आसा. हें परिस्थितींत भाजपा कितें करता, हाचे कडेनूय सगल्यांचे लक्ष आसा. हांगांय भाजपान निर्णय घेतल्यार वेगळेंच चित्र दिसपाक शकता.
स्टॅलीनाच्या द्रमूक पक्षाचे राजवटींत खर विरोधाचें राजकारण चलतालें. थळाव्या सरकाराचें केंद्रा कडेन जुळनाशिल्लें. संघर्श जातालो. आतां विजयाचो टीव्हीके पक्ष सरकार स्थापने खातीर यत्न करता. विरोधकांच्या सांगातान ताचें सरकार जाता? काय भाजपा मेतेर जावन टीव्हीकेक सत्तेर हाडटा? हें पळोवचें पडटलें. विरोधकांक हाताक घेवन विजयान सरकार स्थापन केलें जाल्यार केंद्रा कडेन तो कसो वागता? कशे तरेन काम करता? हाचेरूय सगलें निंबून आसा. तशेंच भाजप मेतेर जावन तांचे सरकार करता जाल्यार केंद्रा कडेन आपशीच बरे संबंद आसतले.
केरळांत वेगळीच स्टोरी चल्ल्या. थंय तीग जाण मुख्यमंत्री पदा खातीर दावो करतात. आतां तिगांयनी निर्णय काँग्रेसीच्या पक्ष श्रेश्ठींचेर सोडला. काँग्रेस कोणाची निवड करता, हाचेर फुडलें राजकारण थारतलें.
दुसरे वटेन अस्तंत बंगालांतल्या निकाला वेल्यान दिसून येता ही वेळ भाजपाचीच आसा. सध्या तरी दुसरो पर्याय ना. प्रादेशीक पक्ष भाजपाच्या सांगातान फुडें वचपाचो पर्याय घेतात. तशेंच विरोधकां कडेन ठोस असो उपाय ना. जो मेरेन विरोधक डळमळीत आसा, तो मेरेन भाजपाक हालोवप शक्य ना, अशें सध्या तरी दिसता.
नारी शक्ती विधेयक पास जावंक ना. विरोधकांनी आडमेळीं हाडलीं. ह्या मुद्द्याचेर भाजपान विरोधकांक फोडलो. अस्तंत बंगालांतूय ताची प्रतिक्रिया दिसली. थंय फाटल्या 15 वर्सां सावन आशिल्ले नारी शक्तीक देशाचे नारी शक्तीन खर जाप दीत घरा धाडली. काँग्रेस आनी स्टॅलीनाच्या पक्षाकूय ताचो फटको बसलो. तामिळनाडूंत तिसरो पर्याय दिसलो, तातूंतच विजय चित्रपटांचो सुपरस्टार, ताची क्रेझ ताका फायद्याची थारली.
देशहिताचो विचार करून केन्ना केन्ना निर्णय घेवचे पडटात. विरोधकांनी विरोध करपाक जाय म्हूण विरोध करपाक जायना. केन्ना केन्ना बऱ्या गजालींक तेंको दिवपाक जाय. तेन्नाच भरिल्लें उरता. नाजाल्यार आशिल्लेंय वता. अशी परिस्थिती सध्या विरोधकांची जाल्या.
तामिळनाडूंत लोकांक भाजप तसो वळखीचो नाशिल्लोच. पूण ‘नारी शक्ती’क जावपी विरोध पळोवन तांणी स्टॅलीनाक घरा धाडलो. भाजप नाका म्हूण तिसरो पर्याय दिसलो. असो तिसरो पर्याय बरो घटमूट आसल्यार हेर कडेनूय फुडाराक असो निकाल दिसूं येता. भाजपा खातीर हो निकाल म्हणल्यार एके तरेन ‘अलार्म’ आसा. लोकांक तिसरो पर्याय सोदचो पडूंक जायना. भाजप होच पर्याय अशें दिसपाक जाय, अशी कामगिरी करपाक जाय. भाजपाचो विजयरथ, तशेंच विकसीत भारताचे दिकेन चालू आशिल्लें काम पळयल्यार हें सहज शक्य ना. तशेंच भाजपाचे सुशासन आसल्यार फुडली जायतीं वर्सां भारतभर भगवो दिसतलो, हातूंत दुबाव ना.
आसाम, अस्तंत बंगालांतल्या निकालान भारताच्यो शिमो आनीक घटमूट जातल्यो अशें भाजपाचे फुडारी म्हणटात. बांगलादेशांतल्यान जावपी घुसखोरीचेर उपाय काडप खऱ्यानीच आतां शक्य आसा. तशेंच अस्तंत बंगालांत बायलां सुरक्षीत नात म्हूण मुद्दो वयर आयिल्लो. बेरोजगारीय वाडिल्ली. प्रधानमंत्री मोदी हांणी हाचेर उपाय काडपाचें आस्वासन दिल्लें. थंयच्या मतदारांनी हे फावटी भाजपाक संद दिवन पळोवया म्हूण मतदान केलां. आतां लोकांचो विस्वास राखपाची जबाबदारी भाजपाची आसा. भाजप मेळिल्ली संद सोडचो ना, अशें दिसता. तशेंच थंयच्या बेकायदेशीर कामांचेर बुलडोझर चडटले, हें निश्चीत आसा. कित्याक तर आसामांत हिमंता बिस्वा सरमा हांच्या सरकारान फाटल्या जुलय-ऑगस्टांत बुलडोझर चडोवपाची मोहीम चालीक लायिल्ली. बेकायदेशीरपणान भारतांत रावप्यांक तांणी उक्तडार हाडिल्लें.
निकाल लागले उपरांत आपल्याक निकाल मान्य ना म्हूण ममता बॅनर्जीन मुख्यमंत्रीपद सोडपाक न्हयकार दिल्लो. निमाणें परिस्थिती समजून तिणें राजिनामो दिलो. मात, इतलें करून ती ओगी बसपी बायल न्हय. थंयचें जायते प्रस्न आसात, मतदारांची नांवां मतदार वळेरेंत ना, जनगणना असले प्रस्न घेवन ती फुडें येतली. ती हारिल्ल्यान विधानसभेंत दिसची ना. मात, विधानसभेंत येवपाक ती कोणाक तरी सीट सोडपाक सांगपाक शकता.
फुडें गोंयांतूय वेंचणूक जावपाची आसा. ते खातीर भाजपान योग्य तरेन आंखणी करपाची गरज आसा. 30 सुवातो जिखपाचो विस्वास भाजपाक आसा. मात, दुसरे वटेन भाजपाचो मित्रपक्ष मगो एकठांय आयल्यार 25 तरी सुवातो जिखतले म्हूण दावो करता. भाजपान फुडें वतना खंय उणें आसा थंय भरून काडपाची गरज आसा. दुसरे वटेन मतदारांनी काँग्रेसीक 2 खेपे बरे पैकीं सुवातो दिल्यो. मात, भाजपान मैदान मारलें. आतां मतदार काँग्रेसीचेर विस्वास दवरीत काय? सध्यातरी गोंयांतल्या मतदारां कडेन तिसरो पर्याय ना. तामिळनाडूंतल्या विजया भशेन हांगाचो विजय व्हड प्रमाणांत उमेदवार उबे करचो ना. आरजीपी सगल्याक उमेदवार दवरता, पूण जिखपा इतलें मताधिक्य तांचे कडेन आसतलें काय? आप सध्या तरी भितरले भितर घुस्पला. प्रस्थापीत जाल्ले फुडारी पक्ष सोडून वचपाक लागल्यात. मगो भाजपा वटेन आसा. राष्ट्रवादी अस्तित्व तिगोवपा खातीर दीसरात एक करता. अशें परिस्थितींत भाजप-मगो आड काँग्रेस आनी हेर अशें समिकरण आसा. ह्या समिकरणान मतदारांचेर अस्तंत बंगालांतल्या निकालाचो प्रभाव पडपाक शकता.

अमर पाटील
7507495151