भांगरभूंय | प्रतिनिधी
श्री लयराई माता….आयच्यान शिरगांवां होमखण जात्रेक सुरवात जाल्या. फांतोडेर होमखण जालें. हजारांनी धोंडांनी तातूंतल्यान अग्नीदिव्य केलें. गोंयचेच न्हय तर कर्नाटक , महाराष्ट्रांतले देवीचे भाविक वर्सान एकदा शिरगांवां येताच येता.
श्री लयराई देवी आणि म्हापशेंची मिलाग्रीस सायबीण ह्यो खाशेल्यो भयणी, अशी भक्तगणांत श्रद्धा आसा.
फेस्ताच्या दिसा मिलाग्रीस सायबिणीक शिरगावांतल्यान देवी लयराई देवस्थाना वतीन तेल, तर म्हापशेच्यान लयराई देवीक जात्रेच्या दिसा सेंट जेरॉम चर्चींतल्यान मोगरेची ताजी टवटवीत फुलां भेट म्हणून धाडटात. ही धर्मीक परंपरा पुर्तुगेज काळा सावन अखंडित चालू आसा.
खर उपास- तापास करपा खातीर सोंवळे रावन देवीचें व्रत करपी भक्तगण, एकदा देवीचे दर्शन घेतकुच उपास सोडटात. ल्हानशा माटवांत, खोपींत रावन नितळसाण पाळुन धोंड उपास करतात. हे व्रत करतना, चुकुन माकुन भ्रस्टाकार जायत जाल्यार, धगधगत्या होमखणांतल्यान अनवाणी पायांनी वतना तांचेर कोप जावन पांय लासुंक शकतात, अशी भक्तांची भावना आसा.
” बोला पुंडलिक वरदा हरी विठ्ठल, पार्वती पते हर हर महादेव, सीताकांत स्मरणम जय जय रा,म श्री गुरुदेव दत्त, श्री देवी लयराई माता की जय ” ……..असो देवीच्या नावाचो गजर करत, कडक उपास- तापास करपी धोंड, देवीचे भक्त आणि हेर लोक, वेपारी देवी लयराईक मेळपाक आशेल्ले आसतात. तिचें दर्शन घेवपाची भक्तांक व्हड उमळशीक लागिल्ली आसता.
देवीचे दर्शन घेवचे पयली, सगळे धोंड तळयेर न्हातात. मागीर बेताची बडी घेवन धोल- ताशाच्या तालार धगधगत्या होमखणातल्यान चलत वतात. आयज फांतोडेर हो भव्य, दिव्य सुवाळो जालो. तो पळोवन हजारांनी भाविकांचे दोळे तृप्त जाले.
पांचवे साडयेन सजिल्ले, मोगर्यांच्या कळ्यांनी नटिल्ले आई लयराईचे दर्शन, आशीर्वाद घेवपाक भाविकांची आयज सावन पांच दीस शिरगांव गांवांत भिरी पडटली. कौल घेवपाक गर्दी जातली.
शिरगांव आणि सरभोंवतणच्या वाठारांत, जात्रा जावच्या तीन- चार म्हयन्या पयलीं गांवांत दरेका वाड्यार, प्रत्येकाच्या पोरसांनी मोगर्यांचे वेलींची कुयदाद सुरु जाता. आई लयराईक मोगर्यांचे कळ्यांचो खुपुच घोस्त. ताका लागुन जात्रे दिसांनी मोगर्यांक भरपुर मागणी आसता. जाका लागुन, मोगर्यांची पोरसा फुलयणार्यांक आणि तांच्यो फातयो, माळो, वळेसर करुन विकणार्यांक जात्रेदिसांनी बरी येणावळ जाता. ह्या दिसांनी हेर व्यापारा वांगडाच मोगर्यांच्यो फातयो आणि हारांचो व्हडलो वेव्हार जाता…
देवीच्या कलशांतल्या उदकांत, हे जात्रेक दवरिल्लो मोगरेचो कळो फुडले जात्रे मेरेन ताजो- तवानो उरता. कलश आनी मोगरेचो कळो प्रत्येक जात्रेक बदलतात.
रितें मायेचे थळांत म्हज्या
जात्रा सपनांची रंगल्या
होमखण पेटोवन
सायबिण म्हजी
धोंड घेवन नाचल्या.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
