भांगरभूंय | प्रतिनिधी
भांगरभूंय । प्रतिनिधी
फोंडेंः संजीवनी साकर कारखान्याच्या ऊस उत्पादकांक सरकार फकत आस्वासनां दिवंन फटयत आसा. फाटल्या म्हयन्यांत पणजे आझाद मैदानार आंदोलन केल्या उपरांत मुख्यमंत्री डॉ प्रमोद सावंत हाणे दोन दिसांत कारखान्या संबंदी निर्णय घेवपाचें उतर दिल्लें. हे गजालीक आतां देड म्हयनो जावपाक आयला. सरकारान शुक्रार 1 मार्च मेरेन कारखान्या संबंदीचें धोरण स्पश्ट केलें ना जाल्यार ऊस उत्पादक खर आंदोनाची तयारी करतले, अशी शिटकावणी गोमंतक ऊस उत्पादक संघटनेन मंगळारा सरकाराक दिल्या.
संजीवनी साकर कारखान्यांत मंगळारा ऊस उत्पादक संघटनेच्या पदाधिकाऱ्यांची बसका जाल्या उपरांत संघटनेचो अध्यक्ष राजेंद्र देसाय पत्रकारां कडेन उलयतालो. बसेक हर्षद प्रभुदेसाय, फ्रान्सिस मस्कारेन्हास आनी हेर पदाधिकारी हाजीर आशिल्ले. कारखानो सुरू करपाचें आस्वासन दिवंन सरकारान कांय वर्सां आदीं साधन सुविधा समितीची निवड केल्ली. ते समितींत ऊस उत्पादक संघटनेच्या वांगड्यांक आसपावंन घेतिल्लें. सरकार फकत आस्वासनां दिवंन दिकाभूल करता म्हणून आमच्या वांगड्यांनी समिती वांगडी पदांचो राजिनामे दिल्ले अशें देसाय हाणे सांगलें.(
कारखान्यांत इथेनॉल प्रकल्प सुरू करतले अशें सरकारान सांगिल्लें. ते खातीर ऊस उत्पादकांनी व्हो प्रकल्प सुरू करपा खातीर कंत्राटदार लेगीत हाडून दिला. इथेनॉल प्रकल्प सुरू करपा खातीर लागू केल्ल्यो अटी सदळ करपा खातीर सरकारान यत्न करपाक जाय. कारखानो सुरू करपाची सरकाराची जर इत्सा ना जाल्यार तो ऊस उत्पादकांक चलोवपाक दिवचो. आमी तो चलोवपाक सक्षम आसात अशें राजेंद्र देसायान सांगलें.
ऊस उत्पादकांनी जायते फावट आंदोलन केल्या उपरांत सरकारा कडल्यान फकत आस्वासनां मेळटात. प्रत्यक्षांत सरकारी यंत्रणा कसलीच हालचाल करना. ह्या कारखान्यााचेर शेंकड्यांनी लोक निंबून आसात हें सरकाराक खबर ना अशें दिसता. आमी 1 मार्च मेरेन वाट पळयतले आनी फुडली कृती करतले अशे ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
