भांगरभूंय | प्रतिनिधी
बिगर मोसमी पावसाचें प्रमाण 31 टक्के उणें
पणजी: गोंयांत आयज पावस पडपाचो अदमास हवामान खात्यान उक्तायला. हाका लागून आयज 27 तारखेक हवामान खात्यान पावसाचो येलो एलर्ट जारी केला. गोंयांत अदीं मदीं पावसाच्याे सरयो पडत आसल्यो तरी बिगर मोसमी पावसाचें प्रमाण 31 टक्के उणें आसा.
1 मार्च 2026 उपरांत आतां मेरेन सरासरी 6 मिमि पावसाची नोंद जाल्या. हे प्रमाण 31.6 टक्के उणें आसा. सध्या वैशाख म्हयनो सुरू आशिल्ल्यान तापमान वाडत आसा. हाका लागून गरमी सोसू नजो जाल्या. चडांत चड तापमान वाडत आसा. शेनवारा सत्तरी, सांगें आनी धारबांदोडें वाठारांत पावस पडलो. सत्तरे पावसा परस गडगडो आनी वारें चड मारलें. हाका लागून लुकसाण जालें. शेनवारा सांग्यार सगल्यांत चड 14.5 मिमि जाल्यार धारबांदोड्यां 10.5 मिमि पावसाची नोंद जाली. फोंडें, दाबोळी वाठारांत पावस पडलाे.
वाडट्या तापमानाक लागून गरमी वाडल्या. मात पावसाच्यो सरी पडले उपरांत काय तेंप तापमान देंवतां. अंदूं हवामान खात्यान पावसाची शक्यताय उक्तायतना खूबशे फावटी येलो एलर्ट दिलो. येलो एलर्ट दिवन लेगीत पावस मात थोडेच खेपो पडलो.
बिगर मोसमी पावसाचो विचार करीत जाल्यार आतां मेरेन सांग्यार सगल्यांत चड 16.8 मिमि पावसाची नोंद जाल्या. हाचे फाटल्यान धारबांदोड्यां 14.7 मिमि, केप्यां 10.8, सांखळे 6.2 मिमि पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
