भांगरभूंय | प्रतिनिधी
हरमल: हरमला एका लग्नाक चोर आयले आनी तांणी आयेराचें बॅग चोरून व्हेलें. चोरी केल्ल्या बॅगांत लाखांचो म्हालवज आशिल्लो. हो सगलो न्हवर्या वटेनचो आयेर चोराक पावलो. सध्या पुलीस चोरांचो सोद घेतात.
पुराय प्रकरण कितें?
हरमला एका लग्नाच्या हॉलांत चोरी जाली. चोरांनी आयेराचें बॅग फारायलें. फोटो सेशना वेळार बॅग काडून कुशीक दवरिल्लें. ते संदीचो फायदो घेवन चोरांनी तें थंयच्यान नाच्च केलें. ह्या बॅगान ८ तोळ्यांचो भांगरा हार, भांगराची मुदी, मोबायल, आयेराचीं पाकिटां मेळून लाखांचो म्हालवज आशिल्लो. हें बॅग न्हवर्या वटेनचें आशिल्लें. तांणी ह्या बॅगांत सुमार २० लाखांचो म्हालवज आशिल्ल्याचो दावो केला.
हरमलच्या नायक कुटुंबांतल्या लग्न सुवाळ्याक हो प्रकार घडलो. दनपारचें जेवण- खाण जाल्लें. व्हंकल- न्हवर्या वांगडा सोयर्यांचें फोटो सेशन चलिल्लें. ह्या वेळार आयेराचें बॅग सांबाळपी मनीस कांय वेळा खातीर बॅग कुशीक दवरून फोटो खातीर माचयेर गेलो. हीच संद घेवन चोरांनी तें बॅग फारायलें. हे चोरये विशीं कोणाक समजचे पयलींच चोरांनी थंयच्यान पळ काडलो. कांय वेळान आयेराची बॅग ना तें पळोवन लग्नाच्या हॉलांत बोवाळ जालो.
उपरांत हे चोरये विशीं मांद्रें पुलिसांक म्हायती दिली. म्हायती मेळटांच पुलीस घडणुके सुवातेर पावले. सध्या सीसीटीव्ही कॅमेरे पळोवन चोराक धरपाचो यत्न पुलीस करतात. ही चोरयेची घडणूक सिसीटीव्ही कॅमेर्यांत कैद जाल्या. हातूंत चोरांचीं तोंडां स्पश्ट दिसल्यांत.
नेपाळी सारको दिसपी एका मनशाचेर पुलिसांनी दुबाव उक्तायला. तो मनीस हॉलांत बरे कपडे घालून आयिल्लो. ताचो वांगडी हॉला भायर दुचाकी घेवन राविल्लो सीसीटीव्ही फुटेजींत दिसता. पुलिसांनी हे दोगूय दुबावीत खंयूय दिसल्यार रोखडोच संपर्क करचो म्हूण उलो मारला. ह्या प्रकरणाचो मांद्रें पुलीस तपास करता. अशीच एक घडणूक दोन वर्सां वयलीं उत्तर भारतांत घडिल्ली. तेन्ना एके टोळयेन अशेंच भांगराच्या वस्तींचें बॅग फारायिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
