भांगरभूंय | प्रतिनिधी
आतां पूजा पुराय गोंयभर आनी गोंया भायरुय स्वता ट्रक घेवन वता. मनांत कसलीच भिरांत दवरनासतना, ताच्या मनांत दोन गजाली कायम आसतात— एक….
वेगवेगळ्या मळांचेर खाशेली कामगिरी करपी बायलांचो म्हाका सदांच अभिमान दिसत आयला. तांची ही अजोड कामगिरी हांव पयलीं सावन टी.व्ही. चॅनल वा दिसाळ्यांतल्यान लोकांच्या मुखार हाडटा. ह्या वर्सा मार्च म्हयन्यांत ‘महिला दिना’ निमितान थिवेच्या लायन्स क्लबांत एके खास कार्यावळीचें आयोजन केल्लें. म्हाका थंय मुखेल सोयरे म्हूण आपयल्लें. म्हज्या हातांनी कितल्याशाच बायलांचो सत्कार जालो. तांतली एक बायल ट्रक ड्रायव्हर आसा अशें कळ्ळें आनी हांव अजाप जाले. कितें? एक बायल ट्रक चलयता? हांव सामकें भारावून गेलें. तिचो सत्कार करताना अभिमानान म्हजे दोळे भरून आयले. रोखडोच हांवें तिचो फोन नंबर घेतलो.
दुसऱ्या दिसा हांव ताका मेळ्ळें आनी ताची अद्भूत शौर्यगाथा आयकली. तीच हांव तुमचे मुखार दवरतां. पूजा वायंगणकर ही दिवचलची. वन हें ताचें जल्मगांव. बापायचें नांव सुभाष वायंगणकर आनी आवयचें लक्ष्मी. ताचें शिकप हणजुणेंतल्या सेंट मायकल कॉन्व्हेंट शाळेंत जालें. घरची परिस्थिती खूब गरीब. ताका लागून तें फुडलें शिकप घेवंक शकलें ना. मागीर ताणें एके ट्रॅव्हल एजन्सींत धा वर्सां काम केलें. ल्हानपणा सावन पूजालक ट्रक ड्रायव्हिंगचें पिशें आशिल्लें. येता- वतना खंयचोय ट्रक पळयलो की ताका दिसतालें, ‘एक बायल म्हूण हांव ट्रक ड्रायव्हर कित्याक जावंक शकना?’ हो प्रस्न तिका ट्रक चलोवपा खातीर सदांच उमेद दितालो.
उपरांत ताचें लग्न जालें. ताणें एक ल्हान हॉटेल सुरू केलें, पूण तें नुकसाणेंत गेलें. उपरांत ताच्या वैवाहीक जिणेंत खूब आडखळी आयल्यो आनी सगळें सोंपलें. मागीर अशें जालें की ताचे आवयन वन गांवांत सुवात घेवन घर बांदलें, जंय नेस्ले (Nestlé) कंपनीचें व्हडलें आस्थापन आसा. थंय कितल्याशाच ट्रक धनी आनी ड्रायव्हरांची यो- वच आसताली. पूजा तांचे कडेन उलयतालें— ‘म्हाका ट्रक ड्रायव्हर जावपाची ओड आसा, ताच्या संबंदांत म्हाका सगळें जाणून घेवपाचें आसा,’ अशें ताणें तांकां सांगलें. तेन्ना ताणीं तिका सांगलें की पयलीं तूं दुचाकी आनी चार चाकी (मोटार) शिक, मागीर आमी तुका ट्रक चलोवपाक शिकयता.
रोखडेंच पूजा स्कुटी, मागीर बायक आनी गाडी शिकलें. आतां पूजांत खूब धैर्य आयलें. ताणें रोखडीच ट्रक ड्रायव्हिंगाक सुरवात केली. एका ट्रक ड्रायव्हरा कडल्यान सुमार सहा म्हयने तिणें प्रशिक्षण घेतलें आनी पूजा पूर्णपणान एक कुशळ ड्रायव्हर जालें.
पूजाचे बाबतींत आनीक एक भांगरा सारकी गजाल घडली ती म्हणल्यार ताका दिसलें, आपलोच एक ट्रक आसल्यार हांव धनी आनी हांवूच ड्रायव्हर. जाका लागून हो ट्रकाचो वेवसाय म्हाका फायद्याचो थारतलो. पूण पूजाची परिस्थिती ओडगस्तीची आशिल्ली. तरी ताणें धीर धरून रीण घेतलें आनी एक ट्रक विकतो घेतलो. ताचे हप्तेय ताणें नेमस्तपणान भरूंक लागली. पूजान म्हाका सांगलें, ‘मॅडम, हांव एक ट्रक धनी आनी ड्रायव्हर. आनी म्हजे कडेन ट्रक चलोवपाचें लायसन्सूय आसा. म्हाका स्वताक ‘हेवी व्हेयिकल ड्रायव्हर’ म्हणपाक खूब अभिमान दिसता. आज म्हजें स्वप्न पूर्ण जालां आनी हांव तातूंत शंभर टक्के खूश आसां.’
पूजा आपल्या ह्या यशाचें श्रेय देवाक दिताच, ते भायर ह्या मळावेले आपले देवरुपी गुरू रामचंद्र तेली ऊर्फ दादा तेली हांकां दिता. आतां पूजा पुराय गोंयभर आनी गोंया भायरुय स्वता ट्रक घेवन वता. मनांत कसलीच भिरांत दवरनासतना, ताच्या मनांत दोन गजाली कायम आसतात— एक देवाचेर विश्वास आनी दुसरी म्हणल्यार आपलें ट्रक ड्रायव्हर जावपाचें स्वप्न पूर्ण जालां तें…
‘आगे बढो पूजा, सर मुखार…’ म्हणत हांवें ताचो निरोप घेतलो.
– सौ. अमिता नायक सलत्री
96233 67906
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
