भांगरभूंय | प्रतिनिधी
कितल्याशाच दिसाळ्यांनी काजल चोडणकर हें नांव एक तर खबरांत आसता, ना जाल्यार तिचे वळखीचो लेख तरी आसताच. अभिनयाच्या मळाचेर हुशार आशिल्ली काजल, जीपीएससी परिक्षा दिवन तातूंत यश मेळोवन आतां बेती हांगाचे सरकारी शाळेंत मुख्याध्यापक म्हूण रुजू जाल्या. तिणें पदभार सांबाळ्ळ्या उपरांत तिंका विद्यार्थ्यांक घेवन नवी दिल्लीक वच्चें पडलें. ल्हानपणासावन ती वेगवेगळ्या कार्यावळींनी वांटेकार जाताली.
काजल ल्हानपणा सावन धडपड्या स्वभावाची. कितल्याशाच कार्यावळींनी तिका इनामां लेगीत मेळ्ळ्यांत. शिक्षिका म्हूण तिणें डी.एम.सी. (म्हापशें) तशेंच नागझरी हांगा बरें काम केलें. आतां माध्यमिक शाळ्येची मुख्याध्यापिका म्हूण आपली जबाबदारी ती यशस्वीपणान पेलतली, हातूंत दुबावूच ना. एक म्हणल्यार ती कला अकादमीच्या ‘रंगमेळा’ची (Repertory) विद्यार्थी, ते भायर तिचे कडेन आशिल्लो उच्च माध्यमिक मळावेलो अणभव तिका उपेगाक येतलो. सेंट झेवियर्स कॉलेजांत तिणें पदवी घेतली आनी त्या उपरांत ती गोंय विद्यापिठांत इंग्लीश विशयांत एम.ए. करपाक गेली. दिवली नाच आसूं, मूक नाट्य (Mime) आसूं वा फेन्सी ड्रेस सर्त आसूं, काजल तातूंत वांटेकार जातालीच, इतलेंच न्हय तर इनामांय आपल्या नांवार करताली.
व्हड जातकच तिचेर जायत्यो जबाबदाऱ्यो आयल्यो. सम्राट क्लबाची (माशेल) जबाबदारी ही तातूंतलीच एक. वाठारांतल्या कामाची सगळी जापसालदारकी घेतना तिणें सगळ्यो सर्ती बेसबरे तरेन घडोवन हाडल्यो. ती आपल्या करियरा खातीर संघर्श करताली आनी निमणे कडेन शिक्षकी पेशांत ती स्थिरावली. खरें तर काजलाक अभिनयाचो फांटो लागींचो. गोंयांत तशेंच गोंया भायर लेगीत तिणें प्रयोग केल्यात. त्या भायर गोंयांतल्या टिव्ही मालिकांनी आनी माहितीपटांनीय ती दिसल्या. सम्राट क्लबाची स्थापना जाल्या उपरांत माशेल शाखेची अध्यक्ष म्हूण तिची नेमणूक जाली. ती तारीख आशिल्ली 20 ऑक्टोबर 2020. कोविड काळांत असल्यो जबाबदाऱ्यो घेवपाक कोणूच तयार नासलो, पूण अशें आसून लेगीत सगळे नेम पाळून तिणें सम्राट क्लबाच्या वतीन समाजकार्य केलें.
ती म्हणटा, “आमच्या विद्यार्थ्यांक म्हजो उपेग जातलो.” तिचे गुण विद्यार्थ्यां खातीर खूब मोलाचे थारतले. जे विद्यार्थी गोंया भायले आसतात, तांकां भाशेची अडचण येवंक शकता, अशा वेळार अभिनयांतल्यान तांकां शिकोवप सोंपें जातलें. ‘कसल्याय भागाचें नाट्य रुपांतर केलें, तर तो विशय भुरग्यांक रोखडोच कळूंक शकता. हाचेर सध्या हांव म्हज्या सहशिक्षकांचोय विचार जाणून घेतां. जरी ताणीं कसलो कोर्स केल्लो नासलो, तरी तांकां कल्पना आसूं येता. पयलीं सोपो भाग घेवप आनी मागीर कठीण भागा कडेन वचप, हो क्रम ताका उपकाराक पडटलो.’ जरी तिका आतां शिकोवचें पडलें, तरी ती स्वता एक उत्कृश्ट निवेदक आनी बरी अभिनेत्री आशिल्ल्यान, तशेंच आवाज बरो आशिल्ल्यान ताचो उपेग कशे तरेन करूं येता, हें तिका खबर आसा. हे सगळे गुण ती विद्यार्थ्यां मेरेन पावोवंक शकता. ती एक अष्टपैलू कलाकार आनी आपल्यातले हे गुण आपल्या विद्यार्थ्यां मदीं येवचे म्हूण ती सदांच प्रयत्नशील आसतली.
रंगमेळाची (कला अकादमी) विद्यार्थी आशिल्ल्यान तिचो संपर्क बरो आसा. सरकारी स्तराचेर जाल्ल्या जायत्या बऱ्या कार्यावळींनी ती परीक्षक म्हूण वावुरल्या. स्वर्गीय विष्णू वाघ हांच्या उगडासाक जाल्लो ‘विष्णुरूपदर्शन’ कार्यक्रम आसूं वा प्रख्यात चित्रकार संजय हरमलकार हांच्या चित्रप्रदर्शनाची कार्यावळ आसूं, काजलान तातूंत वांटेकार जावन कार्यावळीक सोबा हाडली. ह्या भायर तिणें स्मरणिकेचें संपादन करून, ह्या मळाचेरय हांव फाटीं ना, हें सिद्ध केलें. ती म्हणटा की तुमच्या कडेन जर अभिनया सारकी कला आसली, तर कठीण भाग लेगीत सोंपो जावंक शकता. हातूंतल्यान तुमी विद्यार्थ्यांच्या आवाजाचीच न्हय, तर तांच्या कल्पकतेचीय पारख करूं शकतात. बायलमनीस म्हणल्यार संसारांत वावुरताना कांय मर्यादा येतात, पूण ताची जाणविकाय दवरून तुमी कामाक न्याय दिवंक शकतात. “सध्या जरी नाट्य शिक्षकांची मदत घेवन आमी बरे तरेन सादरीकरण करूं शकतात. पर्यावरण हो सगळ्यांक म्हत्वाचो विशय. जर तुमी मात्शी मेहनत केली, तर हाचें सादरीकरण प्रभावी करूं येता आनी हो गंभीर विशय सगळ्यां मेरेन पावोवंक येता.”
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
