भांगरभूंय | प्रतिनिधी
म्हापशें, प्रतिनिधी ः तिस्क सुकूर रस्त्यार चलत्या कारींतल्यान बियरीची बाटली उडयतना दुबावित शंकरलाल राधेश्याम खतिक (32, जयपूर राजस्थान) ह्या पर्यटकाक पर्वरी पुलिसांनी अटक केली.
ही घडणूक मंगळारा दनपारां घडली. राजस्थानांतल्यान चार जाण गोंय भोंवडेर आयिल्ले. तांणी जीए 07 टी 0207 क्रमांकाची रेट अ कॅब कार घेतली. ती घेवन चारूय पर्यटक म्हापशें सावन पणजे वटेन वताले. तातूंतले कांय जाण गाडयेंत बियर पियेवन रिती बाटली चलते कारींतल्यान रस्त्यार उडयताले.
दुबावितान तिस्क सुकूर रस्त्यार बियरीची रिती बाटली रस्त्यार उडयली. ही घडणूक उल्लेख केल्ल्या गाडये फाटल्यान आशिल्ल्या पुलिसांच्या नदरेक आयली. दुबावित गाडयेच्या ड्रायव्हराच्या कुशीच्या सीटार बशिल्लो.
रोखडीच पुलिसांनी उल्लेख केल्ली गाडी धरली आनी दुबाविता सयत गाडी पर्वरी पुलीस स्टेशनांत व्हेली. थंय दुबावीत शंकरलाल खातिक हाचेर भौशीक सुवातेर बियरीची बाटली रस्त्यार उडयल्ल्या आरोपांत गुन्यांव नोंद करून ताका अटक केली. उल्लेख केल्ली गाडीय पुलिसांनी जप्त केल्या. पुलीस निरिक्षक राहुल परब हांच्या मार्गदर्शना खाला पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
