भांगरभूंय | प्रतिनिधी
भांगरभूंय । खबरां मेज
पणजीः दाबोळी विमानतळ वाठारांतल्या फनेल विभागांत थारावीक उंची परस चड बांदकाम केल्ल्या तशेंच बेकायदेशीर घरांचेर मुंबय उच्च न्यायालयाच्या गोंय खंडपिठान दिल्ल्या आदेशा प्रमाण मुरगांव उदरगत आनी नियोजन प्राधिकरणा वरवीं (एमपीडीए) कारवाय करतात. तातूंत नौदलाची कसलीच मनमानी वा हस्तक्षेप ना. दाबोऴी विमानतळा वयले हवाई येरादारीचे सुरक्षे खातीर ऍरक्राफ्ट कायदो तशेंच नागरी उड्डाण म्हासंचालकान घालून दिल्ल्या नेमांक पाळो दिवप सगल्यांत म्हत्वाचें आसा अशें स्पश्टिकरण भारतीय नौदलान दिलां.
भारत सरकाराचें संरक्षण मंत्रालयाती मार्गदर्शक तत्वा आनी नेम आनी शर्थीक पाळो दिवंन नौदल फनेल विभागांत थारावीक उंचीचें बांदकाम करपाक ना हरकत दाखले (एनओसी) दिता. हीं उंचायेची मर्यादा वेगवेगळ्या निकशां प्रमाण दितात. विमानतळ आनी धांवपट्टी पासूनचें तांचे अंतर पळोवन हे दाखले दितात. विमानां विमानतळार देंवतना तशेंच तांच्या उड्डाणा वेळार मदीं कसलेच आडमेळे आसपाक जायना हाचेर चड लक्ष दितात अशें नौदलान एके प्रसिद्धी पत्रकांत नमूद केलां.
दाबोळी विमानतळ वाठारांत बेकायदेशीर बांदकाम करून इमारती बांदपाचें काम व्हडा प्रमाणांत चलिल्ल्यान 2018 वर्सा कांय नागरिकांनी तांच्या आड मुंबय उच्च न्यायालयाच्या गोंय खंडपिठान याचिका सादर केल्ली. 2022 वर्सा न्यायालयान एनओसी नाशिल्लीं तशेंच थारावीक उंची परस चड आशिल्लीं बांदकामा मोडून वडोवपाचो आदेश दिल्लो. संबंदीत बांदकामांची नॅशनल इन्स्टिट्यूट ऑफ हायड्रोलॉजी, एमपीडीए, गोंय पुलीस हाणी 2022 वर्सा नागरी उड्डाण म्हासंचालकानी केल्ले सूचोवणे प्रमाण सर्वे केल्लो. न्यायालयाच्या आदेशाची संबंदीत घर धनयांक सगली म्हायती दिल्ली अशें नौदलाचें म्हणणे आसा.
एमपीडीएन फनेल विभागांतली संबंदीत घरां मोडपाच्या न्यायालयाच्या आदेशाची कार्यवाही करूंक नाशिल्ल्यान फाटल्या जानेवारी म्हयन्यांत तांच्या आड न्यायालयीन अवमानाची कारवाय सुरू केल्ली. गोंयच्या नगर नियोजन खात्यान एमपीडीएक घऱां मोडपाची कारवाय करपाचो आदेश दिल्लो. त्या प्रमाण तांणी काम सुरू केलां. हातूंत भारतीय नौलदाचो कसलोच हात ना. आमचे खातीर दाबोळी विमानतळ आनी ताच्या वाठारांत रावपी लोकांची सुरक्षितताय सगल्यांत म्हत्वाची आसा अशे नोदलान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
