भांगरभूंय | प्रतिनिधी
मडगांव, प्रतिनिधी : पॉवर हावज जंक्शन ते व्हिक्टर अपोलो हॉस्पिटला मेरेनच्या रिंगरोडाच्या सोबितीकरणाचें काम जीएसआयडीसीन सुरू केलां. तशेंच जांचे गाडे आशिल्ले तांकां स्थलांतरीत केल्यात. कांय अतिक्रमण आजूनय आसात. तांकां तीं काडपाक लायल्यांत. जर तांणी तीं काडूंक ना जाल्यार १ जानेवारी सावन कारवाय करतले, अशें आमदार दिगंबर कामत हांणी सांगलें.
मडगांवचे आमदार दिगंबर कामत हांणी पॉवर हावजा कडल्यान अपोलो व्हिक्टर हॉस्पिटला मेरेनच्या रिंगरोडाच्या कामाची पळोवणी केली. ह्या वेळार तांचे वांगडा पालिका अधिकारी, पुलीस, जिल्होधिकारी कार्यालयांतले अधिकारी हाजीर आशिल्ले.
रेल्वेची परवानगी मेळटांच सबवेचें काम सुरू
दामोदर म्हाविद्यालया कडल्या सब वेच्यान येवपी गाड्यांक दावे वटेन वचपा खातीर रस्तो करतले. कोकण रेल्वेकडेन हे खातीर ना हरकत दाखलो मागला. कोकण रेल्वेन जोड पळोवणी केल्या. सप्तकभरांत रेल्वेकडल्यान ना हरकत दाखलो मेळटलो. दाखलो मेळ्ळ्या उपरांत दुसर्या दिसा सावन काम सुरू करतले, अशें आमदार कामत हांणी फुडें म्हणलें.
पॉवर हावजा लागसारा खुबशे ट्रक उबे करतात. ट्रक टर्मिनस जरी जालें तरी ही समस्या येवची ना. मंत्री असतना मडगांवच्या घाउक नुस्तें मार्केटा लागसारा १.४० लाख चौरस मिटर जागो ट्रक प्लाझा ट्रान्सपोर्ट टर्मिनसा खातीर दवरिल्ली. पूण हो प्रकल्प कांय कारणांक लागून आडखळ्ळा. आतां हांगा गाडयो लावपाक जागो उपलब्ध ना. मडगांवाक आतां ताची गरज आसा अशीं दिसना अशें आमदार कामत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
