भांगरभूंय | प्रतिनिधी
पेडणें: देवसु कोनाडी ते पेडणें नगरपालिके मेरेनचो रस्तो सामको धोक्याचो जाला. ह्या रस्त्यार सगल्याक फोंडकुलां पडल्यांत. तशेंच सदांच हांगा खणपाचें काम चालूच आसता. हाका लागून जर आठ दिसां भितर ह्या रस्त्याचें डांबरीकरण जायना जाल्यार रस्याचेर येवन धरणें आंदोलन करपाची शिटकावणी ग्रामस्थां वतीन मिशन फॉर लोकलाचे राजन कोरगांवकार हांच्या नेतृत्वा खाला नागरिकांनी आनी मिशन फॉर लोकल हांणी पेडणें भौशीक बांदकाम खात्याचे अधिकारी शिवनाथ गांवस हांकां लेखी निवेदन दितना थळाव्या पत्रकारांकडेन म्हायती दितना वयर केल्ली शिटकावी केली.
ह्या वेळार मधुकर पालयेंकार, उगवें मोपाचे आदले सरपंच शशिकांत महाले, राजू नर्से, किनळेकार, आदले सरपंच रुपेश परब आनी बायलां, नागरीक हाजीर आशिल्ले.
कोणाच्या कमिशना खातीर हो रस्तो आडकून उरलो
मिशन फॉर लोकलाचे राजन कोरगांवकार हांणी, आदीं रस्ते फोंडकुलांनी भरिल्ले. ते खातीर आमदार नासतना प्रवीण आर्लेकार रस्त्यार बसून भजन करताले. तेन्ना ते माजी उपमुख्यमंत्री बाबू आजगांवकार हांचेर टिका करतना ३० टक्के कमिशना खातीर रस्ते आडकून उरतात, अशीं भाशणां करताले. आतां हें सरळ तीस टक्के कमिशन आमदाराक मेळना म्हणून ते ह्या रस्त्याची फाटपुरवण करिनात काय? असो प्रस्न मिशन फॉर लोकलचे राजन कोरगांवकार हांणी केलो. सरकारान आठ दिसां भितर रस्त्याचें हॉट मिक्स करूंक ना जाल्यार नागरिकां वांगडा रस्त्यार येवन आंदोलन करपाची शिटकावणी तांणी दिली.
ह्या वेळार हाजीर आशिल्ल्या सगल्यांनी हो रस्तो डांबरीकरण करपाची मागणी केली. तशेंच आठ दिसां भितर डांबरीकरण जायना जाल्यार आंदोलन करपाचीय शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
