भांगरभूंय | प्रतिनिधी
भाजीपालो, फळां आनी बीफाचो आसपाव
पणजीः बोंडला अभयारण्यांत रानवटी जनावरां खातीर वर्साक ३५,४०६ हजार क्विंटल इतले खाण लागतलें. हातूंत २३,७२५ कील भाजी, ३७५६ कील फळां आनी ७९२५ कील बिफाचो आसपाव आसा. ह्या इतल्या खाणा खातीर अदमासान ५० लाख इतलो खर्च येवपाची शक्यता आसा.ह्या खाणांची पुरवण करपा खातीर काडिल्ल्या निवेदनांतल्यान ही म्हायती मेळ्ळ्या.
बोंडला अभयारण्यांतल्या जनावरांक तशेंच वाटयल्ल्या जनावरांक बीफ, भाजीपालो आनी मिश्रफळां ह्या सारकिल्ल्या नाशवंत खाद्यपदार्थाची पुरवण करपा खातीर उप वनपालेचे कचेरेन अर्ज मागयल्यात.
मेळिल्ले म्हायती नुसार सगळ्यात चड पुरवण ही भाजीपाल्याची आसतली. हातूंत टमाट, तवशीं, दुधी, बटाट, पडवळ, गाजर, बीट, कोबी, भेंडें, कारातीं, तेंडलीं, मिरसांग हांची दर दिसाक ७५ किल इतली पुरवण जातली आनी हाचो अदमासीक खर्च १४.०८ लाख आसतलो. वर्साच्या ३१७ दिसा खातीर हाची पुरवण जातली.
जाल्यार दुसरे सुवातेर मिश्र फळांची पुरवण जातली. हातूंत आपोल, संत्रां, पेअर्स, चिकू, काळींग, पोपाय, द्राक्षा, आंबें, डाळींब, पेर, कीवी आनी हेर फळांची दर दिसाक १२ किल पुरवण जातली जाल्यार केळींची दर दिसांक ६ डजन पुरवण जातली आनी हाचो अदमासान खर्च ५.४४ लाख इतलो आसा. वर्साचे ३१३ दिसां खातीर हाची पुरवण जातली.
तिसरे सुवातेंर बीफ हे मासांची दर दिसाक २५ किल इतली पुरवण जातली आनी हाचो अदमासीक खर्च ३०.५१ लाख इतलो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
