भांगरभूंय | प्रतिनिधी
पणजी, प्रसाद शेट काणकोणकर ः 28 ते 30 डिसेंबर मेरेन वागातोर जावपी सनबर्न इलेक्ट्रॉनिक म्युझिक फेस्टिवला संबंदी मुंबय उच्च न्यायालयाच्या गोंय खंडपिठांत हस्तक्षेप याचिका दाखल केल्या. सनबर्न जाता त्या वाठारांतल्या एका खाशेल्या भुरग्यांन ही याचिका दाखल केली. संबंदीत भुरग्यांच्या सुचोवण्यांचेर सरकारान विचार करचो असो आदेश आयज उच्च न्यायालयान राज्य सरकाराक दिलो.
पर्यटन खात्यान वागातोर जावपी सनबर्न फेस्टिवलाच्या आयोजनाक पर्यटन खात्यान ‘नो ऑब्जेक्शन’ दाखलो दिलां. ह्या महोत्सवात कसलेच गैरप्रकार जावचे न्हय म्हणून पुलिसूय तयार आसात. इतलेंच न्हय तर राज्य सचीवांच्या अध्यक्षतेखाला एक समितीय स्थापन केलां. फाल्यां (21 डिसेंबर) सांजवेळा 4 वरांचेर उच्च न्यायालयांत महोत्सवा संबंदी ‘कृती आराखडो’ सादर करतले. हाचे आदीं ज्या वाठारांत हो महोत्सव जावपाचो आसा त्याच वाठारांतल्या एका खाशेल्या भुरग्यान उच्च न्यायालयांत हस्तक्षेपाची याचिका दाखल केल्या. पार्टींत बसयल्ल्या लावड स्पीकरांचेर नियंत्रण दवरचें. कारण ताचो त्रास जाता अशें ह्या भुरग्याचे म्हणणें आसा. आयज ताचे याचिकेचेर सुनावणी जाली तेन्ना सरकारान ताच्या सुचोवण्यांचेर विचार करचो असो आदेश उच्च न्यायालयान दिला. ह्या सगळ्या गजालींचो विचार करून समिती फाल्यां सांजवेळार उच्च न्यायालयांत आपलो कृती आराखडो सादर करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
