भांगरभूंय | प्रतिनिधी
सरपंच, पंच वांगड्यां सयत बायलांकूय पुलिसांनी घेतले ताब्यांत
फोंडें, प्रतिनिधी: भोमा राष्ट्रीय महामार्ग रुंदीकरणा खातीर खोर्ले आनी भोमाच्या ग्रामस्थांचो पयलींच विरोध आसा. सध्या हें प्रकरण न्यायालयांत आसा आनी ताचेर सुनावणी सुरू आसा. तशेंच प्रशासकीय अधिकार्यांनी खर पुलीस बंदोबस्त घालून आयज सकाळीं ह्या भागाचें सर्वेक्षण करपाक चालू केलें. हे फाटभूंयेर आयज सकाळीं थळाव्यांनी हांगा येवन तिडक उक्तायली. तांकां पुलिसांनी ताब्यांत घेतल्या. ताब्यांत घेतिल्ल्यां मदी सरपंच दामोदर नायक, पंचायत वांगडी सुनील जल्मी हांचे सयत हेर बायलांचोय आसपाव आसा.
पुलिसांच्या खर बंदोबस्तांत आयज सकाळ सावन भोमा राष्ट्रीय महामार्गाच्या सर्वेक्षणाचें काम सुरू जालें. हे विशीं म्हायती मेळटांच खोर्ले आनी भोमाच्या लोकांनी थंय येवन गर्दी केली. जमिल्ल्या लोकांनी ह्या सर्वेक्षणाक विरोध केलो. ताका लागून हांगचें वातावरण बरेंच तापलें. सुमार दोनशें ग्रामस्थ हांगा हाजीर आशिल्ले. सर्वेक्षणाच्या कामांत आडखळ निर्माण केल्ल्यान पुलिसांनी नागरिकांक ताब्यांत घेतले. हातूंत सरपंच दामोदर नायक, पंचायत वांगडी सुनील जल्मी हांचे वांगडा बायलांचोय आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
