भांगरभूंय | प्रतिनिधी
सांखळे दिसा उजवाडा चोरी; लोकां मदीं पातळ्ळी भिरांत
दिवचल: सांखळे गजबजिल्ले सुवातेर आशिल्ल्या वामनेश्वर इमारतींत चोरांनी धाडशी चोरी केली. दोन फ्लॅट फोडून सुमार 6 लाखांचो म्हालवज फारायलो. तातूंत भांगराच्यो वस्ती आनी रोख रकमेचो आस्पाव आसा. बिनधास्तपणान एका चारचाकी मोटारींतल्यान आयिल्ल्या चोरांनी हे इमारतींत घुसून 40 मिणटां भितर पयल्या आनी दुसऱ्या माळ्यार दरेकी एक फ्लॅट फोडलो.
मेळिल्ले म्हायती प्रमाण सकाळीं 11.30 ते 12.20 वरां मजगतीं ही चोरयेची घडणूक घडली. ह्या वेळार दोनूय फ्लॅट बंद आशिल्ले. ह्या प्रकरणांत वामनेश्वर रेसिडेंसी ह्या इमारतींतली प्रेरणा प्रकाश पर्येंकार हांणी दिवचल पुलीस स्टेशनार कागाळ नोंद केल्या.
ह्या इमारतीच्या दुसऱ्या माळ्यार तांच्या फ्लॅटांत चोरांनी लोखंडाची गेट आनी दार मोडून प्रवेश केलो आनी आलमारींतली एक भांगराची सरपळी, दोन मुदयो, एक ब्रेसलेट, तीन कानांतले जोड, दोन बांगड्यो आनी एक मंगळसुत्र अशे सुमार 4.50 लाखांच्यो भांगराच्यो वस्ती आनी 28 हजार रोख फारायली. सकाळीं 11.30 ते 12.20 वरां मजगतीं ही चोरयेची घडणूक घडिल्ल्याचें कागाळेंत म्हणलां.
ह्याच इमारतीच्या तिसऱ्या माळ्यार रावपी विपले कुमार हांचोय फ्लॅट चोरांनी लक्ष्य केलो. दर्शनी दार मोडून भितर प्रवेश केलो आनी भितरल्यो भांगराच्यो वस्ती, रोख रक्कम आनी म्हारग घडयाळी असो सुमार 1.13 लाखांचो म्हालवज फारायलो.
वामनेश्वर रेसिडेंसी ह्या इमारतीच्या तळ माळ्यार आशिल्ल्या दिवचल अर्बन सहकारी बँके मुखार सकाळीं 11.30 वरांच्या सुमाराक एक धव्या रंगाची मोटार पार्क जाली. तातूंतल्यान पयलीं दोग जाण देंवले आनी ते जणू काय हेच इमारतींत यो-वच करतात अशा थाटांत इमारतींत गेले.
उपरांत आनीक एकलो देंवलो. अवघ्या वेळाच्या अंतरान इमारतींत घुशिल्ले दोग जाण सकयल आयले. तांचे फाटल्यान तिसरोय आयलो. ते घाईगडबडींत मोटारींत बसले आनी मोटारी सयत फरार जाले. ही मोटार दिवचलचे दिशेन गेल्ल्याचें समजता. हो सगलो प्रकार इमारतींत आशिल्ल्या सीसीटीव्ही कॅमेरांत कैद जाला.
चोरये खातीर ज्या मोटारींतल्यान चोर सांखळे आयिल्ले त्या मोटारीचो क्रमांक जीए 05 डी 8236 आशिल्लो. तो कांय जाणांनी नोंद करून दवरिल्लो, आनी सीसीटीव्ही कॅमेऱ्यांतूय बंदिस्त जालो. मोटारीच्या ह्या क्रमांका वेल्यान पुलिसांनी तपासाक गती दिली. ह्या मोटारीच्या धनयाचो सोद घेवपाचो यत्न केलो तेन्ना ह्या क्रमांकाची मोटार चोरी जाली तेन्ना मूळ धनयाच्या घराच आशिल्ली अशें दिसून आयलें. ताका लागून हे मोटारीक बनावट क्रमांकाची पट्टी बसोवन हो चोरयेचो प्रकार घडलो हें सिद्ध जाता.
ही चोरयेची घडणूक काल (सोमारा) घडली. पूण थळाव्यांच्या म्हणण्या प्रमाण ह्या चोरां मदलो एकलो आदल्या दिसा म्हणल्यार आयतारा ह्या इमारत वाठारांत आयिल्लो. ताणें ह्या इमारतीची चवकशीय एके बायले कडेन केल्ली. उपरांत रोखडोच ह्या चोरांनी चोरयेचो डाव सादलो.
ह्या प्रकरणान सांखळे लोकां मदीं भिरांत पातळ्ळ्या. दिवचल पुलिसां मुखार एक आव्हान उबे रावलां. ह्या प्रकरणाच्या तापसा खातीर वास घेवपी सुणी आनी ठशे तज्ञांचीय मजत घेतली. पुलीस निरिक्षक दिनेश गडेकार हांच्या मार्गदर्शना खाला उपनिरिक्षक विराज धावस्कार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
