भांगरभूंय | प्रतिनिधी
म्हापशें: कामुर्ले शाळेंतल्यान घरा वचपी 10 वर्सा पिरायेचे चलयेचेर रॉटविलर सुण्यान हल्लो करून ताका घांस मारपाचो प्रकार घडलो. कोलवाळ पुलिसांनी सुण्याचो धनी सिद्धार्थ श्रीपाद खोर्जुंवेंकार आनी काळजीवाहू अनिकेत श्रीपाद खोर्जुंवेंकार ह्या सख्ख्या भावां आड गुन्यांव नोंद केला. जखमी चली गांवच्या सरपंचाची आसा आनी ती यत्ता चौथींत शिकता.
ही घडणूक आयतारा सकाळीं 11.45 वरांच्या सुमाराक कातुर्ली-कामुर्ली हांगा घडली. ह्या प्रकरणांत पांडुरंग खोर्जुंवेंकार हांणी पुलिशेंत कागाळ नोंद केल्या. जखमी चलयेचो शाळेंत खेळां महोत्सव आशिल्लो. हो महोत्सव सोंपले उपरांत तें घरा येतालें. त्या वेळार शेजारच्या घरांतल्या रॉटविलर जातीच्या सुण्यान घरांतल्यान उडी मारून हल्लो केलो आनी तिच्या पांयाचे जांगेक घांस मारलो. ताका लागून ताका रक्तस्राव जालो.
रोखडेंच थळाव्या लोकांनी आनी कुटुंबान घडणूक थळार धांव घेवन सुण्याच्या तावडींतल्यान तिची सुटका केली आनी म्हापशेंच्या जिल्हो हॉस्पिटलांत दाखल केली. थंय मुळावे उपचार करून चलयेक घरा धाडलो.
घडणुकेची म्हायती मेळटकच पुलिसांनी सुण्याचो काळजीवाहू अनिकेत खोर्जुंवेंकार हाका ताब्यांत घेतलो. ह्या सुण्याचो धनी सिद्धार्थ खोर्जुंवेंकार आशिल्ल्याचें स्पश्ट जातकच ताकाय ताब्यांत घेतलो.
पोशिल्ल्या सुण्याचेर नदर दवरिनासतना ताका मेकळो सोडून लोकांच्या जिवाक घात निर्माण केल्ल्याच्या आरोपा खाला दोगांय दुबावितां आड भादंसंच्या 289, 336 आनी 34 कलमा खाला पुलिसांनी गुन्यांव नोंद केला.
दोगांय दुबावितांचेर 41(अ) कलमा प्रमाण नोटीस दिल्या. पुलिसांनी त्या सुण्याचो ताबो घेवपाची प्रक्रिया सुरू केल्या. फुडलो तपास पुलीस निरिक्षक विजय राणे हांच्या मार्गदर्शना खाला हवालदार नरेंद्र नायक करतात.
दुबावितांनी हो सुणो देड वर्सां पयलीं हाडिल्लो. हाचे पयलीं ह्या सुण्यान गांवांतल्या कांय जाणांचेर हल्लो केल्लो. त्या वेळार सुण्याचो धनी आनी ग्रामस्थां मदीं समेट जाल्लो. हो सुणो आक्रमक अशा जातीचो आशिल्ल्यान गांवांतल्या लोकां मदीं ताची दहशत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
