भांगरभूंय | प्रतिनिधी
पणजी: कोलवाळ बंदखणींत खून, बलात्कार, अपहरण, जिवघेणो हल्लो, घुंवळे वखदांची तस्करी, मारपेट आनी हेर गुन्यांवकारी कारवायो केल्ले खातीर 31 डिसेंबर 2022 मेरेन 109 जाण ख्यास्त भोगत आशिल्ले. तातूंतले 44.95 टक्के म्हणल्यार 49 कैदी जल्मठेपाची ख्यास्त भोगत आसात. जाल्यार 109 मदले 39.44 टक्के म्हणल्यार 43 कैदी खुनी आशिल्ल्याचो अहवाल राष्ट्रीय गुन्यांव नोंदणी विभागा कडल्यान (एनसीआरबी) जारी केला.
गोंयांत भारतीय दंड संहितेच्या खून, बलात्कार, जिवघेणो हल्लो, फटवणूक, अर्थीक गुन्यांव जाल्यार विशेश कायदो वा थळाव्या कायद्या खाला जशें घुंवळे वखदांची तस्करी, म्हायती आनी तंत्रज्ञान कायादे, सायबर आनी मोटार अपघात कायद्या खाला गुन्यांवांत आस्पाव आशिल्ल्याचें सिद्ध जाल्ल्यान 109 जाणांक गोंयांतल्या विवीध न्यायालयांनी ख्यास्त दिल्या. तातूंत 103 दादले, जाल्यार 6 बायलांचो आस्पाव आशिल्लो. तशेंच तातूंत 99 देशी जाल्यार 10 विदेशी नागरीक आसात.
हातूंतल्या 49 कैद्यांक जल्मठेपेची ख्यास्त दिल्ली. जाल्यार 15 कैद्यांक 10 ते 13 वर्सांची ख्यास्त, 12 कैद्यांक 7 ते 9 वर्सां, 11 कैद्यांक 2 ते 4 वर्सां, 6 कैद्यांक 1 ते 2 वर्सां, 15 जाणांक स म्हयने ते 1 वर्स, जाल्यार एकल्याक स म्हयन्यांची ख्यास्त दिल्या.
वर्सभरांत 132 कैदी भोगतात ख्यास्त
2022 वर्सा खून केल्ले खातीर 43 कैदी ख्यास्त भोगतात. तशेंच ड्रग्स तस्करींत वांटेकार 25 कैदी, बलात्कार केल्ले खातीर 16 कैदी, जिवघेणो हल्लो केल्ले खातीर 6 कैदी, सदोश मनीसवधाक लागून 4 कैदी, जाल्यार दरेकी दोन कैदी अपहरण आनी बायलांचो छळ वा विनयभंग केल्ले खातीर ख्यास्त भोगत आसात.
तशेंच 6 कैदी जबरी चोरी वा हेर गुन्यांवकारी प्रकार केल्ल्यान ख्यास्त भोगत आसात, तीग जाण फटवणूक केल्ले खातीर ख्यास्त भोगत आसात. हातूंतल्या तीन कैद्यांनी परतून गुन्यांव केल्ल्यान तांकां ख्यास्त भोगची पडली. वयल्या काळांत 132 जाणांक ख्यास्त दिल्ल्यान बंदखणींत घाल्यात. जाल्यार 91 कैद्यांची ख्यास्त पुराय जाल्ल्यान तांची सुटका केल्या. तशेंच ख्यास्त बोगत आशिल्ले 16 कैदी मानसीक दुयेंसान त्रस्त आशिल्ल्याचें मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
