भांगरभूंय | प्रतिनिधी
सुभाष फळदेसाय: आंबेडकर हांच्या तत्वां प्रमाण मुखार वचपाची गरज
पणजी: स्वताच्याच समाजांत दरी निर्माण करिनासतना संघटीत रावन समाजाचो विकास सादप शक्य आसा. पर्वरे आंबेडकर भवन फुडल्या कांय वर्सांत उबे करतले अशें समाज कल्याण मंत्री सुभाष फळदेसाय हांणी सांगलें.
भारतरत्न डॉ. बाबासाहेब आंबेडकर हांच्या महानिर्वाण दिसा निमतान अखील गोंय दलीत म्हासंघा वतीन पाटो-पणजी हांगासरल्या कला आनी संस्कृती खात्याच्या सभाघरांत आयोजीत कार्यावळींत ते मुखेल सोयरे म्हूण उलयताले.
ह्या वेळार तांचे सयत अनुसुचीत जाती जमाती आयोगाचे अध्यक्ष दीपक करमळकार, पेडणेंचे नगराध्यक्ष सिद्धेश पेडणेंकार, मुखेल उलोवपी दयानंद म्हेत्तर आनी हेर मानेस्त हाजीर आशिल्ले.
ज्या काळांत देशांत जातियतेचें स्तोम माजिल्लें. दलितांचेर अन्याय, अत्याचार जाताले, त्याच काळांत डॉ. बाबासाहेब आंबेडकर हांणी शिक्षण आनी बुद्धीमत्तेच्या बळार संवसाभर उजवाड घालो. संवसारांतली सगल्यांत व्हड लोकशाय आशिल्ल्या भारताचें संविधान तांणी बरयलें. त्याच संविधाना प्रमाण आयजूय देशाचो कारभघर चलता. आंबेडकरांचे विचार, तांची तत्वां आयजूय देशा खातीर तारक आसात. ताका लागून सगल्यांनी तांच्या तत्वां प्रमाण मुखार वचप आनी स्वता सयत स्वताच्या समाजाचो उद्धार करप गरजेचें आसा अशें मंत्री सुभाष फळदेसाय हांणी सांगलें.
दलीत समाज आयज सगल्या मळार विकास सादीत आसा. ह्या समाजांतले तरणाटे वेगळ्यावेगळ्या मळार फुडारपण सिद्ध करून दाखयतात. ह्या तरणाट्यांनी बाबासाहेबांचे विचार आपणावन मार्गक्रमण करप आनी स्वताच्या समाजांतल्यो विवीध वण्टी उद्धवस्त करून समाजाचो विकास सादप गरजेचें आसा अशेंय मंत्री फळदेसाय हांणी सांगलें.
ह्या वेळार हेर मानेस्तांचींय भाशणां जालीं.
आंबेडकर भवन वर्सभर उरतलें उक्तें
म्हज्या समाज कल्याण मंत्रीपदाच्या कार्यकाळांतूच पर्वरे आंबेडकर भवन उबारपा खातीर आपले यत्न सुरू आसात. ते खातीर सरकारा कडेन सेगीत फाटपुरवणूय सुरू आसा. हें भवन म्हणल्यार फक्त इमारत नासतली, जाल्यार तें विद्या, भक्तीचें मंदीर आसतलें. हें मंदीर वर्सभर सगल्यां खातीर उक्तें आसतलें अशें सुभाष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
