भांगरभूंय | प्रतिनिधी
पणजी: केंद्रीय साहित्य अकादेमी, गोवा कोंकणी अकादेमी आनी बाल भवन पणजी हांच्या जोड पालवान आयोजीत केल्ले शणै गोंयबाब जिवीत आनी बरप ह्या विशयाचेर दोन दिसांचो राष्ट्रीय परिसंवाद 16 आनी 17 डिसेंबर दिसा पणजेंत आयोजीत केला.
उक्तावण सुवाळ्याक ज्ञानपीठकार दामोदर मावजो मुखेल सोयरे म्हूण हाजीर आसतले. ज्येश्ठ गीतकार, लेखक अॅड. उदय भेंब्रे आपलें बीजभाशण करतले. केंद्रीय साहित्य अकादेमीचे प्रादेशीक कार्यालयाचे प्रभारी अधिकारी ओम प्रकाश नागर खासा हाजीर आसतले. गोवा कोंकणी अकादेमीचे अध्यक्ष अरूण साखरदांडे ह्या सुवाळ्याक हाजीर आसतले. साहित्य अकादेमी, गोंय कोंकणी सल्लागार मंडळ संयोजक मॅल्वीन रॉड्रिगीश, गोंय प्रतिनिधी हेर वांगडी पूर्णानंद च्यारी, गोवा कोंकणी अकादेमीची सचीव मेघना शेटगांवकार आनी बाल भवन पणजीचे संचालक दयानंद चावडीकार हाजीर आसतले.
उदय भेंब्रे हांचें बीजभाशण जाले उपरांत शणै गोंयबाबाच्या वावराचेर संशोधनात्मक प्रपत्रां वेगळेवेगळे मानेस्त सादर करतले.
चार वेगळ्यावेगळ्या सत्रांनी चलतल्या ह्या परिसंवादांत पयल्या सत्रांत- 1. शणैगोंयबाब भास अभ्यास आनी अस्मिताय हांचेर भूषण भावे, 2. मायभास आनी शिक्षण विचार, प्रकाश वजरीकार, 3. सुशांत नायक, भाशेच्या अभ्यासाची साधनां विशीं संशोधनात्मक प्रपत्र सादर करपाचे आसात. मेल्वीन रॉड्रिगीश ह्या सत्राचें अध्यक्षपद सांबाळटले.
दुसऱ्या सत्रांत- शणै गोंयबाब: इतिहास संशोधन आनी कर्तुत्वाची दखल. 1. शणै गोंयबाब: संशोधन उर्बा आनी दिल्ली देख, देविदास पै. 2. सोद: इतिहासाचो आनी कर्तुत्वाचो, प्रजल साखरदांडे, 3. शणै गोंयबाब: संशोधनाची खेरीत रीत, पालिया पंडित आनी अध्यक्ष डॉ. किरण बुडकुले हाजीर आसतली.
तिसऱ्या सत्रांत- 17 डिसेंबर दिसा सर्जनशील साहित्यांतलें तत्वगिन्यान. 1. आरण्यकां: साहित्यीक खाशेलेपण, हनुमंत चोपडेंकार, 2. संवसार बुट्टी ह्या आरण्यकांतलें तत्वगिन्यान, प्रकाश पर्येंकार, 3. उलोवपां बरोवपांतलें प्रगतीक विचारांचें दायज पूर्णानंद च्यारी आनी गोकुळदास प्रभू हे अध्यक्ष म्हूण हाजीर आसतले.
1. अनुसर्जन, प्रकारंतर, रुपकार, अविश्कार ह्या विशयाचेर निमाण्या सत्रांत फ्रांसा ते गोंय: नाट्य खेळांची आगळी कळाशी, मित्रा बरोकार, 2. रुपकार, प्रकारांतलो अविश्कार, फा. लुईश गोमीश, 3. पांडुरंग फळदेसाय गीता भाशांतरांतली भास शैली आनी देविदास कदम अध्यक्ष आसतले.
समारोप सुवाळ्यांत फा. मौजीन आतायद अध्यक्ष म्हूण जाल्यार मानाची सोयरी म्हूण मेघना शेटगांवकार, सचीव गोवा कोंकणी अकादेमी, दयानंद चावडीकार, संचालक वांगडी सचीव बाल भावन हे आसतले. जाल्यार समारोपाचें उलोवप गोवा कोंकणी अकादेमीचे उपाध्यक्ष वसंत सावंत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
