भांगरभूंय | प्रतिनिधी
पणजी, बातमीदार ः पर्यटना खातीर लोकप्रीय आशिल्ल्या गोंयांत फाटल्या 2- 3 दशकांत घुंवळे वखदां संबंदीत वेवसायाची बरीच उदरगत जाल्या. मुख्यमंत्री डॉ. प्रमोद सावंत हांणी राज्यांतल्या अंमली पदार्थां आड सरकाराची ‘झीरो टॉलरन्स’ अशी भुमिका परतून परतून चालीक लायल्या. गोंय पुलिसांचे कामगिरीक लागून जायत्या ड्रग्स वेपाऱ्यां आड कारवाय जाल्या आनी कोटी रुपयांचो माल जप्त करून विलो लायला.
2020 ते 2022 ह्या काळांत राज्यांत 537.58 किलो घुंवळे वखदां जप्त करपांत पुलिसांक येस आयलां. हातूंत चडशें ५३४ किल गांजाचो आस्पाव आसा. केंद्रीय गृह राज्यमंत्री नित्यानंद राय हांणी हालींच संसदेंत ही म्हायती दिली. हे संबंदी खासदार विक्रमजीत सिंग शहाणे हांणी अतारांकित प्रस्न मांडिल्लो.
मंत्री राय हांच्या जापेंतल्यान 2020 वर्सा गोंयांत 147.82 किलो गांजा आनी तत्सम पदार्थ जप्त केल्यात. 321 ग्राम कोकेन, 978 ग्राम सायकोट्रोपिक ड्रग, 382 ग्राम हेर अमली पदार्थ आनी 41 ग्राम ओपीयम जप्त केल्या. अंदूं पुलिसांनी वट्ट 149.04 किल अमली पदार्थ जप्त करपाक येस मेळयलें.
2021 वर्सा 136.33 किल गांजा आनी तत्सम पदार्थ जप्त केल्ले. 82 ग्राम कोकेन, 96 ग्राम सायकोट्रोपिक ड्रग, 186 ग्राम हेर अमली पदार्थ आनी 9 ग्राम ओपीयम जप्त केल्यात. अंदूं वट्ट 136.70 किल अमली पदार्थ जप्त केले.
2022 वर्सा अमली पदार्थ जप्त करपाचो आंकडो वाडलो. अंदूं वट्ट 251.84 किल अमली पदार्थ जप्त केल्यात. हांतूत 250.03 किल गांजा, 329 ग्राम कोकेन, 671 ग्राम सायकोट्रोपिक ड्रग, 417 ग्राम हेर अमली पदार्थ आनी 391 ग्राम ओपीयम जप्त केल्यात.
तीन वर्सांत 421 गुन्यांव नोंद
राज्यांत तीन वर्सांत अमली पदार्थ प्रतिबंधक कायद्या खाला 421 गुन्यांव नोंद जाल्यात. ह्या प्रकरणांत 544 जाणांचेर आरोपपत्र दाखल केल्लें. जाल्यार 49 जाणांक ख्यास्त दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
