भांगरभूंय | प्रतिनिधी
1 लाख रोख रक्कम, 16 लाखांचें फारायलें भांगर
म्हापशें: गणेशपुरी, म्हापश्यां गृहनिर्माण वसणुकेंतलो एक फ्लॅट अनवळखी चोरांनी दिसा उजवाडा फोडलो. भांगराच्यो वस्ती आनी 1 लाख रोख रक्कम मेळून वट्ट 17 लाखांचो म्हालवज फारायलो. ही घडणूक बिरेस्तारा 14 वेर दनपारां घडली. दनपारां 2.10 ते 3.05 ह्या वरां मजगतीं चोरांनी फ्लॅट फोडलो.
गणेशपुरींतल्या विनायक निवास ह्या बंगलाेवजा अपार्टमेंटांत दुसऱ्या माळ्या वयलो कागाळदार सतीश भुपाली हांचो हो फ्लॅट आसा. कागाळदाराचे गणेशपुरींत किरणां दुकान आसा. तांची घरकान्न वयले वेळेंत फ्लॅट बंद करून दुकानार गेल्ली. थंय सावन तिका कागाळदार सतीश हांणी तांचे चलयेचे शाळेंत सोडली. ह्या वेळांत चोरांनी तांचो फ्लॅट फोडलो.
कागाळदार घरकान्नीक सोडून 3.05 वरांचेर फ्लॅटार जेण करपा खातीर आयलो. तेन्ना मुखेल दाराचे कुलप मोडिल्ले अवस्थेंत तांचे नदरेक पडलें. तांणी भितर वचून पळयत जाल्यार आलमारींतलें सामान जळामळां पडिल्लें.
चोरांनी फ्लॅटाच्या बेडरुमांतली आलमार फोडली. तातूंत आशिल्ल्यो बांगड्यो, हार, कानांतलीं, मुदी, भांगराची सरपळी, मंगळसुत्र अशें 15 ते 16 लाख रुपयांच्यो भांगराच्यो वस्ती आनी एक लाख रुपया रोख रक्कम असो 17 लाखांचो म्हालवज चोरांनी फारायलो.
घडणुकेची म्हायती मेळटकूच पुलीस निरिक्षक सीताकांत नायक, उपनिरिक्षक गौरव नायक आनी वांगड्यांनी घडणूक थळार धांव घेतली आनी पंचनामो केलो. ठशे तज्ञ आनी वास घेवपी सुण्यांचो वापर केलो.
ह्या प्रकरणांत म्हापशें पुलिसांनी अनवळख्या चोरां आड भादंसंच्या 454, 380 कलमा खाला गुन्यांव नोंद केला. फुडलो तपास पुलीस करतात.
कागाळदार भुपाली हांणी दिवाळे वेळार बँक लॉकरांतल्यान भांगर हाडून घरांत दवरिल्लें. आतां मार्गशीर्ष म्हयन्यो सुरू जाल्ल्यान तांणी ह्यो भांगराच्यो वस्ती परतून लॉकरांत दवरिनासतना घरांतूच दवरिल्ल्यो. हें सगलें भांगर चोरून व्हेलें.
शेळपें, धुळेर हांगासरल्या क्लेमंट रेसिडेन्सी ह्या इमारतींतल्या पयल्या माळ्या वेले जांबावलीकार हांचो दिसा उजवाडा फ्लॅट फोडून अनवळखी चोरांनी लाखांनी रुपयांच्यो भांगराच्यो वस्ती आनी रोख फारायिल्ली. ही चोरयेची घडणूक 10 नोव्हेंबर दिसा वयले पद्दती प्रमाणूच दिसा उजवाडा घडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
