भांगरभूंय | प्रतिनिधी
म्हापशें, प्रतिनिधी ः रिव्होल्यूशनरी गोवन्स हो पक्ष येवपी लोकसभा वेंचणुके कडेन खोलायेन लक्ष घालतना दिसता. हो पक्ष गोंयांत दोनूय जाग्यांचेर लढटलो. हे फाटभंयेर हालींच जाल्ले आरजीचे बसकेंत उत्तर गोंयांत दोन जाल्यार दक्षीण गोंयांत तीन नांवांची शिफारस केल्या. येवपी कांय दिसांनी पक्षाची वेंचणूक समिती दोनूय मतदारसंघांतल्या नांवांचेर शिक्को मारतली, अशी म्हायती पक्षाचे मनोज परब हांणी दिली.
आयज म्हापश्यां जाल्ले एके कार्यावळींत परब उलयताले. हालींच आरजीच्या कार्यकर्त्यांची बसका जाली. हे बसकेंत येवपी लोकसभे खातीर उमेदवारी विशीं चर्चा जाली. कार्यकर्त्यांनी उत्तर गोंयच्यान दोन जाल्यार दक्षीण गोंयच्यान तीन नांवां सुचयलीं. हातूंत उत्तरेक मनोज परब आनी अजय खोलकार, जाल्यार दक्षिणेच्यान रॉबर्ट परेरा, शैलेश नायक आनी विश्वेश नायक हांची नांवां उमेदवारी खातीर वेंचून काडल्यांत अशें परब हांणी सांगलें.
गोंयचे जनतेचें सहकार्य जाय
आमी उत्तर आनी दक्षीण गोंयच्यान वेंचूण लढटले. ताका लागून आमी निसरात मेहनत करतां. वेंचणुके खातीर पयशांची गरज आसता. हे पयशे आमकां लोकांक वाटपाक वा तांकां सपनां दाखोवपाक नाका. जाल्यार बॅनर्स, पत्रकां वा बसकेच्या आयोजनां खातीर जाय. ताका लागून आमी लोकांक अर्थीक मजती खातीर उलो मारतात. गोंयची जनता आमकां सहकार्य करतली अशी आस्त आसा, अशें तांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
