उदरगती खातीर विज्ञानिक संस्कृती तयार करपाचे येत्न : मुख्यमंत्री सावंत

भांगरभूंय | प्रतिनिधी

डॉ. माथवराज हांकां पर्रीकार युवा वैज्ञानिक पुरस्कार भेटयलो

धोरणा खातीर वैज्ञानिक, तज्ज्ञांचो सल्लो जाय : विश्वजीत

पणजी, प्रतिनिधी : उदरगती खातीर राज्यांत विज्ञानिक संस्कृती तयार करपाचे येत्न सुरू आसात. पर्रीकर विज्ञान महोत्सवा सारक्यो कार्यावळी विद्यार्थ्यां मदीं वैज्ञानिक दृश्टीकोन तयार जावपाक पुरक थारतात, अशें मुख्यमंत्री डॉ. प्रमोद सावंत हांणी सांगलें.
आदले मुख्यमंत्री मनोहर पर्रीकार हांच्या जल्म दीसा निमतान मनोहर पर्रीकार विज्ञान महोत्सव जालो. उक्तावणाचे कार्यावळीक मुख्यमंत्री हाजीर नाशिल्ले. तरी तांच्या वर्चुअल संदेशाचें वाचन महोत्सवात जालें. भलायकी मंत्री विश्वजीत राणे, एनआयओचे संचालक डॉ. सुनील कुमार सिंग, इस्रोचे अध्यक्ष डॉ. श्रीधर सोमनाथ हांचीं भाशणां जालीं. इस्रोचे वैज्ञानिक डॉ. माथवराज एस. हांकां पयलो मनोहर पर्रीकार युवा वैज्ञानिक पुरस्कार भेटयलो.
विज्ञान, तंत्रज्ञान आनी नवनिर्मिती हांची पर्रीकार हांकां खासा आवड आशिल्ली. विद्यार्थ्यां मदी वैज्ञानिक दृष्टीकोन तयार जावपा सयत राज्यांत विज्ञानिक संस्कृती तयार जावची हो विज्ञान महोत्सवा फाटलो हेत आसा. हाचे खातीर नामनेचे 19 वैज्ञानिक कार्यावळीत विद्यार्थ्यांमदी संवाद सादतले, अशें मुख्यमंत्री सावंत हांणी संदेशात सांगलें.
राज्याचें धोरण थारोवपा खातीर मंत्री तशेच राजकारण्यांक वैज्ञानिक तशेच तज्ज्ञांच्या सल्ल्याची गरज आसा. तज्ज्ञांचो सल्लो आनी तंत्रज्ञानाच्या आदारान राज्याची उदरगत शक्य आसा, अशें विश्वजीत राणे हांणी सांगलें.
इस्रोचे अध्यक्ष डॉ. सोमनाथ हांचें भाशण जाले. इस्रोन फाटले 60 वर्सांच्या कार्यकाळात चांद्रयान मोहीमे सयत बऱ्योच मोहीमो येसस्वी केल्या. उपगिरे (सॅटलायट) तशेच रॉकेट तयार करपाचें तंत्रज्ञान आतां देशात तयार जाता. यंत्रांनी बुद्दिमत्ता (इंटेलिजन्स इन मशिन्स) तयार करपाचे येत्न सध्या सुरू आसा. रॉकेट लॉचिंग अपेशी थारता, जाल्यार तशे संकेत काय खीणा पयली मेळप शक्य जातले. इस्रोच्या फुडल्या वाटचाली विशीची म्हायती तांणी दिली.