भांगरभूंय | प्रतिनिधी
पणजी, बातमीदार ः पणजेच्या चर्च चौक वाठारांत उबी आशिल्ल्या रेन्ट ए कॅब गाडयेचे हारशे फोडून तेलंगणाच्या पर्यटकांचो 2 लाख रुपया रोख रक्कमे सयत 9 लाख रुपया मोलाचो माल लुटलो. ह्या प्रकरणांत पणजी पुलिसांनी बेतोडें- फोंडेंच्या हैदर ऊर्फ रियाज खान आनी निजामुद्दीन जालेगर ह्या दोगांक अटक केल्या.
पर्यटक श्रीधर रेड्डी (तेलंगण) हाणें कागाळ केल्ली. पर्यटकांनी बिरेस्तारा, 7 डिसेंबराक रातच्या 10.30 ते शुक्रारा फातोंडेर 4.20 वरां मजगतीं पणजी चर्च वाठारांत ‘रेंट ए कॅब’ गाडी उबी केल्ली. ह्या वेळार अनवळखी मनशान हारसो फोडून तातूंत दवरिल्लीं चार बॅगां फारायलीं. हांतूत 2 लाख रोख, 5 लाखांचे 2 मॅकबूक लॅपटॉप, 70 हजार मोलाचे सन ग्लास, 50 हजार मोलाचे डायसन हेअर ड्रायर, 50 हजार मोलाचे चप्पल आनी हेर वस्तू चोरल्यो. हाचे भायर कागाळदाराचे इश्टिणीचो पासपोर्ट फारायलो असो उल्लेख कागाळींत आयला. पुलीस निरिक्षक निखिल पालयेकार हांच्या मार्गदर्शना खाला उपनिरिक्षक संकेत पोखरे हांणी गुन्यांव नोंद करून फुडलो तपास सुरु केल्लो.
चोरी जाल्ली त्या जाग्याचे सगळे सीसीटीव्ही फुटेज पुलिसांनी तपासले. तातूंत ‘आय20’ गाडी चोरये वेळार घडणुकेच्या थळार आशिल्ल्याचें दिसून आयलें. पुलिसांनी गाडयेचो सोद घेतलो तेन्ना GA-07-E7794 क्रमांकाची गाडी बेतोडा- फोंडें आशिल्ल्याचे कळ्ळें. पुलिसांनी थंय वचून हैदर रियाझ खान (30) आनी निजामुद्दीन उर्फ मोहम्मद इसाक जालेगर (24) हांकां अटक केली. ताची गाडी आनी चोरीचो माल जप्त केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
