भांगरभूंय | प्रतिनिधी
निलेश काब्राल: संकल्प थिएटर्साच्या 21 व्या नाट्य महोत्सवाचें उक्तावण
केपें: 18 वर्सां पिराये वयल्या दिव्यांग भुरग्यां खातीर चेतना ट्रस्टा वतीन हॉस्टेल उबारतले. ताची बुन्याद रोखडीच घालतले अशें कुडचडेंचे आमदार निलेश काब्राल हांणी सांगलें.
ते कुडचड्यार संकल्प थिएटर्सा वतीन आयोजीत केल्ल्या 21 व्या नाट्य महोत्सवाचें उक्तावण केले उपरांत उलयताले.
ह्या वेळार माचयेर प्रदीप नायक, कार्याध्यक्ष सदेश काकोडकार, अध्यक्ष नवीन खांडेकार, सुनील नायक, राजू नायक, मंगलदास भट, रुपेश बांदोडकार, वसंत भगवंत सावंत, नाटकाचे लेखक तुळशीदास धोणशीकार आनी हेर मानेस्त हाजीर आशिल्ले.
18 वर्सां पिराये वेल्या दिव्यांग भुरग्यांक सरकाराची व्हडलीशी मजत मेळना. ह्या भुरग्यांचे आवय-बापूय खुबूच त्रास घेतात. पूण जांकां आवय-बापूय ना, जांकां कोणूच पळयनात अशा भुरग्यांक चेतना ट्रस्टा वतीन हॉस्टेल उबारपाचो विचार आसा आनी ताची बुन्याद रोखडीच घालतले अशें काब्राल हांणी म्हणलें.
संकल्प थिएटर आनी चेतना ट्रस्ट ह्यो दोनूय संस्था बरें काम करतात. चेतना ट्रस्ट ही दिव्यांग भुरग्यां खातीर कार्य करीत आसा. तांणी सुवात घेवन स्कूल लेगीत उबारलां. 19 वेर कुडचड्यार नव्या हॉस्पिटलाचें उक्तावण जातलें. हातूंत डायलेसीस वॉर्ड, 24 वर्रा फार्मासी, मोग्र ची सुविधा आनी हेर सुविधा उपलब्ध आसतल्यो. उदरगतीच्या कामांत सगल्यांचो पालव म्हत्वाचो आसा अशें निलेश काब्राल हांणी म्हणलें.
संकल्प थिएटर फाटल्या 21 वर्सां सावन बरें आयोजन करता. चार-पांच वर्सां जालीं की कांय आयोजन समिती बंद पडटात. पूण संकल्प थिएटर हाका आडवाद आसा. तांणी सेगीत 21 वर्सा येसस्वी रितीन आयोजन केलां. जे खातीर कुडचडें वाठारांतल्या खास करून तरणाट्यांक बऱ्या नाटकाची, नाट्य मळा वेले संबंदीत कलाकार, दिग्दर्शक, लेखक हांचो संपर्क येता आनी हाका लागून उर्बा मेळटा अशें काब्राल हांणी म्हणलें.
नाट्य महोत्सवाक सगल्यांनी व्हड संख्येन हाजीर रावचें अशें प्रदीप नायक हांणी आवाहन केलें. कार्यावळीचें सुत्रसंचालन वसंत सावंत आनी मंगलदास भट हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
