भांगरभूंय | प्रतिनिधी
वैद्यनगर-बेतोडच्या लोकांची शिटकावणी
फोंडें, प्रतिनिधी: बेतोड्यां पंचायतींत येवन ग्रामस्थांनी वैद्यनगरांत उबारपी कोयर प्रकल्पाक विरोध केलो आनी काम बंद उडोवपाची मागणी केली. १०० परस चड ग्रामस्थांनी सरपंच मधू खांडेपारकार हांचे कडेन चर्चा केली. पंचायत मंडळाची बसका घेतल्या उपरांतूच निर्णय घेतले अशें आस्वासन सरपंचान दिल्या उपरांत ग्रामस्थ घरा परतले. फुडल्या कांय दिसांनी हो प्रकल्प उबारपाचें काम बंद जावंक ना जाल्यार थळावे लोक येवन हें काम बंद उडयतले अशी शिटकावणी ह्या वेळार ग्रामस्थांनी दिली.
ह्या पंचायत वाठारांतल्या ओल्या कोयराचेर प्रक्रिया करपा खातीर पंचायती वतीन वैद्य नगरांत हो प्रकल्प उबारपाचें काम देड म्हयन्यां सावन चलता. त्यान पयलीं पंचायत कार्यालया मुखार प्रकल्प उबारपाक सुरवात जाल्ली. हांगा प्रकल्प उबारपाक लोकांनी हरकत घेतल्या उपरांत प्रकल्प वैद्यनगरांत व्हेलो. सध्या ८० टक्के काम पुराय जालां. नोव्हेंबराच्या निमाण्या सप्तकांत थळाव्यांनी प्रकल्पाक विरोध करपी निवेदन पंचायतीक दिल्लें. ताचेर ११० ग्रामस्थांनी सयो केल्यात. पंचायतीन निवेदन कोयराचे बालदेंत उडयिल्ल्यान आयज ग्रामस्थ सरळ पंचायतींत पावले. ह्या वेळार सरपंच मधू खांडेपारकार, पंच दुर्गाप्रसाद वैद्य आनी उपसरपंच चित्रा सालेलकार हाजीर आशिल्ले.
बेतोडेंचे सरपंच मधू खांडेपारकार हांणी ओल्या कोयराच्या प्रकल्पाचें काम ८० टक्के पुराय जालां. ताका लागून हे संबंदी पंचायत मंडळाचे बसकेंत चर्चा करून निर्णय घेतले अशें सांगलें.
दुर्गाप्रसाद वैद्य हांणी वैद्यनगरांत जावपी प्रकल्पाक थळाव्यांचो विरोध आसल्यार अपूण लोकां वांगडा रावतलों अशें स्पश्ट केलें. हें आपणें आठ म्हयन्या आदीं पंचायत मंडळाचे बसकेंत कळयल्लें. ग्रामस्थांनी विरोध करपी निवेदन जरी उसरां दिलें तरी ताचेर चर्चा जावप गरजेचें. आपूण ग्रामस्थांक पुरायेन तेंको दितलो अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
