छत्तीसगडचे नवे मुख्यमंत्री विष्णू देव साय

भांगरभूंय | प्रतिनिधी

रायपूर, खबरां संस्था: हालींच चार राज्यांनी विधानसभा वेंचणूक जाली. भाजपाक तीन राज्यां मेळ्ळीं जाल्यार काँग्रेसीक फक्त एक राज्य. वेंचणुकेचो निकाल आयले बराबर दोनूय पक्षांनी योग्य अशीं पावलां उबारपाक सुरू केली. मजगतीं तेलंगणात काँग्रेस पक्षान राज्याचो भार रेवंथ रेड्डीचेर सोंपयला.
छत्तीसगडांतूय भाजपान नव्यान वेंचून आयिल्ले आमदारांचे बसकेंत आदिवासी फुडारी आनी आदले केंद्रीय मंत्री विष्णुदेव साय हांकां मुख्यमंत्रीपद दिवपाचें थारायलां.
आयज आयतारा वेंचून आयिल्ल्या आमदारांची बसका जाली. भाजपाचें राज्य मुख्यालय आशिल्ले कुशाभाऊ ठाकरे संकुलांत जाल्ले हे बसकेंत भाजप विधिमंडळ पक्षाच्या फुडार्‍यांची निवड जाली. पक्षाच्या केंद्रीय फुडार्‍यांनी नेमिल्ले निरिक्षक, केंद्रीय मंत्री अर्जुन मुंडा आनी सर्वानंद सोनोवाल आनी पक्षाचे राष्ट्रीय सरचिटणीस दुष्यंत कुमार गौतम हे बसके खातीर रायपुरांतल्या भाजपा कार्यालयांत पावले. नवे वेंचून आयिल्ले प्रदेश प्रभारी ओम माथूर, केंद्रीय मंत्री तशेंच निवडणूक सहप्रभारी डॉ. मनसुख मांडविया, भाजप संघटन प्रभारी नितीन नबीन, भाजप प्रदेशाध्यक्ष अरुण साओ, भाजपाचे राष्ट्रीय उपाध्यक्ष आदले मुख्यमंत्री डॉ. सिंग हेय हे बसकेंत हाजीर आशिल्ले.