नोकर्‍यां विशीं २०२३ वर्स सामकें वायट, सगळ्यांत व्हडलो फटको आयटी कंपनींक

भांगरभूंय | प्रतिनिधी

नवी दिल्ली, खबरां संस्था: कोरोना काळा उपरांत अंदूं भारताची अर्थवेवस्था बरे स्थितींत दिसून आयल्या. परकी गुंतवणुकदारांनी व्हड आत्मविस्वास उक्तायला, ताचो परिणाम शेअर बाजाराचेरूय जाला. तो सध्या ताच्या सार्वकालीक उच्चांकाच्या लागसारा
वेव्हार करता.

अंदूं जायत्या कंपनींक बरो फायदो जावन लेगीत लोकांक कामा वेल्यान काडून उडयल्यात. ल्हान कंपनीं सावन व्हड तंत्रगिन्यान दिग्गजां मेरेन हे सर्तींत वांटो घेतलो. हाचो सगळ्यांत व्हडलो परिणाम आयटी मळार दिसलो. थंय लाखांनी लोकांची नोकरी गेली. नोकरीचे नदरेन हें वर्स खूब वायट जालां.

व्हडल्या कंपनीनींय कर्मचार्‍यांक काडले

भारता खातीर आनी ताच्या नागरिकांक जायत्या पांवड्याचेर हें वर्स बरें थारलां. सध्याच्या संवसारीक मंदीच्या काळांत ह्या देशाचे उदरगतींत उणाव जावंक नासलो तरी ताचो रोजगार मळार व्हड परिणाम दिसता. संवसारांतल्या ल्हान कंपनीं सावन गूगल- मायक्रोसॉफ्ट सारकिल्ल्या व्हडल्या तंत्रगिन्यानाच्या दिग्गजां मेरेन कर्मचार्‍यांक काडपाचो आदेश दिला.

लाखांनी नोकर्‍यो गेल्यो

वर्साचो निमाणो म्हयनो चालू आसा. कर्मचार्‍यांक काडून उडोवपाचे प्रक्रियेचेर अजूनय जायत्यो कंपनी वावुरतात. संगीत प्रवाह एप्लिकेशन स्पोटिफाय हांणी ह्या म्हयन्याचे सुरवातेक १५०० कर्मचार्‍यांक काडून उडयले. हे कंपनीचें कार्यबळ वट्ट १७ टक्के आसा. २०२३ वर्सा २,४०,००० वयर नोकर्‍यो उण्यो जाल्यात, ज्यो २०२२ वर्सा परस ५० टक्क्यांनी वाडल्या. अंदूं हेर कांय व्हड तंत्रगिन्यान कंपनींनी कामांतल्यान काडून उडोवपाची घोशणा केल्या. मायक्रोसॉफ्ट, मेटा, गूगल, अमेझॉन, झूम ह्या कंपन्यांचो हातूंत आसपाव आसा.

Layoffs.fyi च्या अहवाला प्रमाण फकत २०२२ वर्सा १,६४,९६९ परस चड तंत्रगिन्यान कामगारांची नोकरी गेली, जी २०२० वर्सा ८०,००० आनी २०२१ वर्सा १५,००० हाचे तुळेंत बरी आसा. फकत नोव्हेंबर २०२३ वर्सा ६४ तंत्रगिन्यान कंपनींनी ७,०२६ कर्मचार्‍यांक काडून उडयले, जाका लागून तंत्रगिन्यानाच्या काडून उडोवपांत वाड जाल्ल्याचें दिसून आयलां. चडशा कंपनींनी आपलो निर्णय कंपनीची पुनर्रचना आनी खर्चाक लागून जाला अशें सांगलें. तंत्रगिन्यानाच्या मळार नोकर्‍यो वगडावपाचें एक मुखेल कारण म्हळ्यार कृत्रीम बुद्धीचो वापर अशें कांय तज्ञांचें मत आसा.