भांगरभूंय | प्रतिनिधी
म्हापशें: क्लबांत प्रवेश दिवपाक न्हयकारिल्ल्याच्या कारणा वेल्यान बागांतल्या टीटोस् लेनींतल्या क्लब डावन टावन ह्या क्लबाची मोडतोड आनी बावन्सरांक मारपेट करपाची घडणूक घडली. ह्या प्रकरणांत कळंगूट पुलिसांनी तिगां दुबावितांक अटक केल्या.
दुबावितां मदीं निलेश पाटील (हडफडें), दुर्गादास मोरजकार (हडफडें) आनी सुशील महिपाल (नागवा) हांचो आस्पाव आसा. ह्या प्रकरणांत टफ सेक्युरिटी एजन्सीचे वेवस्थापक गणेश पाटील हांणी पुलिशेंत कागाळ नोंद केल्या.
ही घडणूक शुक्रारा फांतोडेर 3 वरांच्या सुमाराक घडली. दुबावीत आरोपी वयल्या क्लबांत प्रवेश करपा खातीर आयिल्ले. पूण क्लबाच्या प्रवेश दारार विजय आनी भवानी ह्या टफ सेक्युरिटीच्या बावन्सर कर्मचाऱ्यांनी तांकां आडायले आनी भितर प्रवेश दिवपाक न्हयकार दिलो. तेच बरोबर दुबावितांनी बावन्सर कर्मचाऱ्यां कडेन वाद घालो आनी लोखंडाचे सळयेन आनी दांडो घेवन तांचेर हल्लो केलो. दोनूय बावन्सराक खर मारपेट केली. तशेंच क्लबाच्या हारशाचें दार आनी कावंटराची मोडतोड केली. दोनूय जखमींचेर हॉस्पिटलांत उपचार सुरू आसात.
ह्या प्रकरणांत कळंगूट पुलिसांनी भादंसंच्या 452, 324, 504, 506(2), 427 आनी 34 कलमा खाला गुन्यांव नोंद करून तिनूय दुबावितांक अटक केली. फुडलो तपास पुलीस निरिक्षक परेश नायक हांच्या मार्गदर्शना खाला उपनिरिक्षक परेश सिनारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
