भांगरभूंय | प्रतिनिधी
वाठारांत भिरांतीचें वातावरण; रान खात्याची सांपळो लावपाची तयारी
फोंडें: मळें-सांकड्ड्यां विजय च्यारी हांच्या घराचे फाटले वटेन बुधवारा रातीं 10.30 वरांचेर ब्लॅक पँथर दिसून आयिल्ल्यान वाठारांत भिरांतीचें वातावरण पातळ्ळां. फाटल्या 2-3 वर्सां सावन तांच्या घरा फाटल्यान अदीं मदीं बॅलक पँथर दिसून येत आशिल्ल्याचें उक्तडार आयलां. वाठारांत सांपळो लावपाची तयारी रान खात्यान सुरू केल्या.
वंडाळ्या-धारबांदोड्यां अतूल नायक हांच्या घरा मुखार ब्लॅक पँथरान खवदळ घाल्लो. फाटल्या कांय दिसांनी ब्लॅक पँथर कोणाचेच नदरेक दिसून येवंक नाशिल्लो. पूण बुधवारा रातीं विजय च्यारी हांचे घराचे फाटले वटेन घरांत प्रवेश करपाचे तयारीत आशिल्लो ब्लॅक पँथर दिसून आयलो. विजय च्यारी हांणी सतर्क रावन दार बंद केल्ल्यान ब्लॅक पँथर थंय सावन रानांत गेलो. फाटल्या 2-3 वर्सां सावन विजय च्यारी हांच्या घरा फाटल्यान अदीं मदीं दिसा उजवाडा लेगीत ब्लॅक पँथर दिसून येतालो. पूण बुधवारा रातीं परतून ब्लॅक पँथर प्रकट जाल्ल्यान सद्या वाठारांत लोक भिरांत उक्तायतात.
नोव्हेंबर म्हयन्यांत वंडाळ्या-धारबांदोड्यां अतूल नायक हांच्या घरा कुशीच्या खूबशा सुण्यांची तशेंच मांजरांची शिकार ब्लॅक पँथरान केल्ली. ब्लॅक पँथराक सांपळ्यांत आडकावपा खातीर रान खात्यान लायिल्ल्या सांपळ्यांत 19 नोव्हेंबर दिसा फांतोडेर 3 वरांच्या सुमाराक एक बिबटो सांपळ्यांत आडकलो. पूण ब्लॅक पँथरा खातीर लायिल्लो सांपळो अजून तेच सुवातेर पडून आसा. 4 नोव्हेंबर दिसा अतूल नायक हांच्या घरांतल्या सीसी टीव्ही कॅमेऱ्यांत ब्लॅक पँथर कैद जाल्लो. ताका लागून 14 नोव्हेंबर दिसा रान खात्यान सांपळो लायिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
