भांगरभूंय | प्रतिनिधी
पणजी, प्रतिनिधी : कोमुनिदाद वांगड्यांची बसका घेवपा सयत समस्यांचेर चर्चा करून सरकाराक उपयां विशी शिफारशी करपाक सरकारान पाच वांगड्यांचो आयोग स्थापन केला. तो कोमुनिदाद समितींच्या वांगड्यां कडेन चर्चा करून सरकाराक उपाय येवजणेंचेर शिफारशी करतलो.
एस्टिफानो डिमेलो (पिळर्ण कोमुनिदाद अॅटर्नी), नेल्सन फर्नांडिस (आसगाव कोमुनिदाद अॅटर्नी), मार्विन गोन्साल्विस(बांबोळी कोमुनिदाद अॅटर्नी), सावियो कोरीया (मडगाव कोमुनिदाद अध्यक्ष), अविनाश तावारीस (कोलवा कोमुनिदाद अध्यक्ष) हे आयोगाचे वांगडी आसा.
सगळ्या कोमुनिदाद वांगड्यांची बसका 14 जानेवारी 2024 दिसा जातली. बसकेचें आयोजन करपाची जापसालदारी ह्या आयोगाचेर आसतली. कोमुनिदादीचे प्रस्न तशेच आडखळी हांचेर चर्चा करून उपायां विशी ही समिती सरकाराक शिफारशी करतली.
बेकायदा घरां आनी अतिक्रमणांची समस्या सगळ्या कोमुनिदादींनी आसा. अतिक्रमणा तशेच बेकायदा घरांची म्हायती बऱ्याच कोमुनिदादीं कडेन ना. सर्वेक्षण करपाची तयारी बऱ्याच कोमुनिदादींची आसा. सर्वेक्षण करतलो जाल्यार कोमुनिदादीं कडेन मनीसबळ ना. अतिक्रमणांचे सर्वेक्षण आनी बेकायदा घरां नेमित करपाविशी सध्या बरीच चर्चा आसा. हो विशय निश्चितपणान चर्चेक येतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
