भांगरभूंय | प्रतिनिधी
म्हापशें, प्रतिनिधी ः घुसखोरी करपी बांगलादेशाच्या एका नागरिकांक फाटल्या जानेवारी म्हयन्यांत धरून परत ताच्या देशांत धाडिल्लो. ताचें नांव मोहम्मद उर्फ जहांगीर मोंडल (२४). तोच घुसखोर काल सांजेच्या 6.30 वरांचेर म्हापशें पुलीस स्टेशनां लागसार भोंवतना दिसलो. ताका पुलिसांनी अटक केल्या.
गोंयांत बांगलादेशी घुसखोर व्हड प्रमाणांत आसात आनी ते वेगवेगळ्या वाठारांत मुक्तपणान रोजगार आनी वेवसायांत आशिल्ल्याचें दिसून आयलां. फाटल्या वर्सा सावन पुलिसांनी अशा घुसखोरांक धरून बांगलादेशांत धाडपाची मोहीम सुरू केल्ली. जायत्या जाणांक धाडिल्ले. जानेवारींत वेर्णें पुलिसांनी मोहम्मद उर्फ जहांगीर मोंडल हाची तपासणी केल्या उपरांत तो बांगलादेशी घुसखोर आशिल्ल्याचें स्पश्ट जालें. भारतीय नागरीक आशिल्ल्याचे ताचे कडेन कसलेंच कागदपत्र नाशिल्ले. पुराय चवकशी उपरांत ताका म्हापशेंच्या स्थानबद्धता केंद्रात दवरून मागीर थंयच्यान बांगलादेशांत धाडिल्लो. पूण काल सांजवेळार म्हापशें पुलीस स्टेशना लागसार तोच घुसखोर भोंवतना दिसलो. पुलिसांनी ताचे कडेन कागदपत्रां मागलीं तेन्ना तीं नाशिल्ल्याचें कळ्ळें. फुडली चवकशी केले उपरांत तो बांगलादेशी नागरिक आसा आनी जानेवारींत वेर्णें पुलिसांनी ताका अटक करून बांगलादेशांत धाडिल्लो हें स्पश्ट जालें. उपरांत म्हापशें पुलिसांनी ताचे आड ‘विदेशी कायदो’ आनी पासपोर्ट प्रवेश कायद्या खाला गुन्यांव नोंद केला. तो परत भारतांत कसो आयलो, केन्ना गोंयांत आयलो, कोणे ताका मजत केली हाची चवकशी म्हापशें पुलीस करतात. पुलिस निरिक्षक सीताकांत नायक हांच्या मार्गदर्शना खाला हवालदार तुकाराम शिरोडकार फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
