भांगरभूंय | प्रतिनिधी
मुख्यमंत्र्याची घोशणा; सांखळी अर्बनाच्या नव्या इमारतीचें उक्तावण
प्रतिनिधी: सगल्या सहकारी पतसंस्थांनी आनी बँकांनी रीण घेवन उपरांत सगल्यांक एकठांयपणान बुडोवपी ठक मनोवृत्तीच्या लोकांचेर नियंत्रण हाडपा खातीर सरकाराचें सहकार खातें येता त्या 31 मार्च मेरेन आगळेंवेगळें अॅप हाडटलें. ते वरवीं थारावीक मनशाची कितल्या पतसंस्थांनी रिणकार आसात आनी तांच्या रिणाची सद्याची स्थिती हाची म्हायती मेळटली. हाका लागून पतसंस्थांक अशा दुबावीत रिणकारा विशीं सादुरताय बाळगुपाक मजत जातली अशी घोशणा मुख्यमंत्री डॉ. प्रमोद सावंत हांणी सांखळे केली.
सांखळी अर्बन सहकारी पतसंस्थेच्या नव्या इमारतीच्या उक्तावण सुवाळ्यांत डॉ. प्रमोद सावंत उलयताले.
ह्या वेळार माचयेर सहकार मंत्री सुभाष शिरोडकार, नगराध्यक्षा रश्मी देसाय, संस्थेचे अध्यक्ष अनील काणेकार, उपाध्यक्ष दत्ताराम पोकळे, संचालक प्रदीप मळीक, प्रेमानंद चावडीकार, संजय देसाय, रामनाथ काणेकार, गीता शिरोडकार, श्रध्दा सुर्लकार, सरव्यवस्थापक कांचन पर्येंकार बी मानेस्त हाजीर आशिल्ले.
रीण बुडोवपी डिफॉल्ट रिणकारा आड चलयता त्या 138 कलमा खालच्या खटल्याची कारवाय आनीक खर करतले. कारण अशा पतसंस्थांतल्यान रीण स्वरुपांत दिल्ले लोकांचे पयशे सहजतायेन बुडोवंक शकनात. हे खातीर 138 कलमा खाला रिणकाराक अटक करून ताचे कडल्यान वसुली करपा खातीर सरकाराचें गृह खातें लेगीत खर करतले अशेंय मुख्यमंत्री डॉ. प्रमोद सावंत हांणी ह्या वेळार म्हणलें.
सहकार मळार हेर माध्यमांनी लक्ष घालचें. ताचो लाव सांखळेकारांक जातलो. सांखळी अर्बनाचें योगदान सांखळे व्हड आसून खूबशा जाणांक गरजे वेळार मजत केल्या. ह्याच कार्यातल्या विस्वासाक लागून आयज ही संस्था येसाचे तेंगशेर पावल्या. हे संस्थेन गरजेवंतांक हाचे मुखारूय मजतीचो हात दितना अंत्योदय तत्वाचेर काम करचें. सांखळी अर्बन संस्थेन आतां मेरेन वैयक्तीक विचार कुशीक दवरून समाजा खातीर कार्य केल्ल्यान ह्या संस्थेची आयज स्वताची प्रशस्त इमारत उबी रावल्या. हातूंत संचालक मंडळा सयत कर्मचारी वर्गाचेंय मोलाचें योगदान आसा अशेंय मुख्यमंत्री डॉ. प्रमोद सावंत हांणी म्हणलें.
देशांत पयलेच फावटी प्रधानमंत्री नरेंद्र मोदी हांच्या फुडारपणा खाला सरकारान सहकार मळाक खात्याचें स्वरुप दिलां. हाचें पयलीं देशांत सहकार खातें नाशिल्लें. ताची धुरा सांबाळत आशिल्ल्या अमीत शाह हांचे कडल्यान ह्या खात्याक फुडारांत बरे दीस येतले. सरकाराचें ह्या खात्या कडेन गंभीरतायेन लक्ष आसा. ते खातीर ह्या क्षेत्रांतल्यान चडांत चड समाजाक लाव मेळोवन दिवपा खातीर यत्न करात अशें आवाहनूय मुख्यमंत्री डॉ. प्रमोद सावंत हांणी ह्या वेळार केलें.
सांखळी हो राज्यांतलो एक आदर्श मतदारसंघ करपा खातीर सांखळेंतल्या दरेक मनशान काम करूंक जाय. सांखळी अर्बनाच्या सगल्या संचालक आनी कर्मचाऱ्यांनी हे संस्थे कडल्यान सामक्या निमाण्या मनशा मेरेन पावून तांकां लाव दिवपाचें कार्य करचें. निसुवार्थी भावनेन केल्ल्या कार्याचें फळ म्हणल्यार ह्या संस्थेची स्वताची नवी इमारत आसा. हे संस्थेचो आदर्श राज्यांतल्या हेर संस्थांनी घेतना संस्थे बराबर समाज कशे तरेन उदरगत करतलो हाचो विचार करून काम करचें अशें आवाहन सहकार मंत्री सुभाष शिरोडकार हांणी ह्या वेळार केलें.
ह्या सुवाळ्यांत मुख्यमंत्री डॉ. प्रमोद सावंत हांचे हस्तुकीं सुशांत पोकळे, दत्तगुरू जोशी, अनुप देसाय, योगेश दिवानी, प्रकाश शेट्ये हांचो भोवमान केलो. फीत कापून, दिवली पेटोवन आनी नांवतकट्याचें अनावरण करून संस्थेच्या नव्या इमारतीचें उक्तावण केलें.
येवकार संस्थेचे अध्यक्ष अनील काणेकार हांणी दिलो. सुत्रसंचालन राधिका कामत सातोस्कार हांणी जाल्यार उपकार उपाध्यक्ष दत्ताराम पोकळे हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
