भांगरभूंय | प्रतिनिधी
पणजी, प्रतिनिधी ः सृजनशीलताय वापरून प्रकल्प (असांयटमेंट) करतकच काॅलेजींत विद्यार्थ्यांक 20 गूण मेळटात. ते मेळोवपाच्या यत्नांत दोन विद्यार्थ्यांनी एक सोबित इलेक्ट्रीक गाडीच तयार केली. हो चमत्कार दिवचलच्या शांतादुर्गा उच्च माध्यमीक शाळेच्या विद्यार्थ्यांनी केलो.
दिवचलच्या शांतादुर्गा उच्च माध्यमीक शाळेंतल्या फिजिक्स शिक्षिकेन विद्यार्थ्यांक 20 गूण मेळोवपा खातीर कितें तरी कल्पक तयार करपाक सांगिल्लें. ही सुचोवणी चडूच गंभीरतायेन घेवन इकरावी विज्ञानाच्या वर्गांतले दोन विद्यार्थी शान शेख आनी सेहब बेग हांणी डीसी मोटाराचेर आदारिल्ली इलेक्ट्रीक गाडयेचो सांगाडो तयार केला. ही गाडी एकदा चार्ज केले उपरांत वराक 40 किमी वेगान 100 किलोमीटर चलता. हे गाडयेचें प्रदर्शन तांणी शाळेच्या आवारांत करुन दाखयलें.
दोन म्हयने कश्ट, 70 हजार खर्च
ही गाडी तयार करपाक दोन म्हयने लागले. तशेंच 70 हजार रुपया खर्च जाले. हे गाडये खातीर जाय आशिल्लीं उपकरणां गॅरेजींतल्यान विकतीं घेतलीं. ते खातीर बारावेंतलो विद्यार्थी मैसुद्दिन मामलेकार हांणे तांकां मजत केली.
फुडल्या सुदारणां खातीर संशोधन
ही गाडी तयार करपी विद्यार्थी शान आनी सेहब हांणी हाचे आदीं वेस्ट इंडिया सायन्स मेळाव्यांत जाल्ले सर्तींत वांटो घेतिल्लो. सद्याचे गाडयेचे मॉडेल प्राथमीक स्वरुपात आसा आनी फुडले गाडयेची श्रेणी तयार करपा खातीर ते संशोधन करतात.
आमदारान केली तोखणाय
दिवचलचे आमदार डॉ. चंद्रकांत शेट्ये हांणी शान आनी सेहब हांच्या यत्नांची तोखणाय केल्या. डॉ. शेट्ये हांणी दोगांयचोय गाडये वांगडा फोटो आपल्या फेसबूक पेजीचेर शेअर केलो आनी फुडल्या कामगिरी खातीर तांकां परबीं भेटयलीं. प्रा. सुलक्षणा सावंत आनी हेर शिक्षकांनीय हे गाडयेंतल्या काॅलेजी मुखार पासय मारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
