भांगरभूंय | प्रतिनिधी
हरमल, बातमीदार: हरमल पंचायत वाठारांतल्या पालयें, भोम ते कोरगांव बगल रस्त्यांची सामकी बाबत अवस्था जाल्या. पावला कणकणी व्हडलीं फोंडकुलां पडल्यां, विद्यार्थ्यांक शाळेंत सोडप त्रासाचें जालां, रस्त्यांची दुरुस्ती राजकी पांवड्यार आडकल्ल्याची भावना पालकांत पातळ्ळ्या. पालक आनी वाहन चालकांनी तिडक उक्तायली.
मजगतीं, राज्याचे मुख्यमंत्री डॉ. प्रमोद सावंत हांणी भौशिक बांदकाम खात्याच्या अधिकार्यांक, प्राधान्यान कोरगांव बगल रस्त्याची दुरुस्ती आनी हॉट मिक्सींग करपाचे आदेश जारी करचे. भुरग्यांक शाळेंत पावोवप धोक्याचें जालां. विद्यालयांत घेवन वचप धोक्याचें जालां. ह्या म्हालाचे पालकमंत्री नात्यान मुख्यमंत्री सावंत हांणी प्राधान्य दिवचें अशी मागणी पालक प्रवीण वायगंणकार हांणी दिली.
फाटल्या पावसा पयलीं ह्या रस्त्यांची अवस्था अशी जाल्या. ती आजूनय सुदारना. हांगा वाहन चलोवप बरेंच त्रासाचें जालां. ह्या रस्तो मार्गांत हरमल पंचक्रोशी शिक्षण संस्थेची मुळावी, माध्यमीक, उच्च माध्यमीक, कॉलेज आनी नर्सींग म्हाविद्यालय आसा. ताका लागून विद्यार्थी आनी शिक्षक वर्ग तशेंच पालक ह्या रस्त्याच्यान व्हडा संख्येन यो-वच करतात. पूण रस्त्याची अवस्था सामकी वायट जाल्ल्यान हांगा सेगीत गाडयांची गचमुड्डी जातना दिसता. ताका लागून भुरग्यांक आनी पालकांक अपघात जावपाची शक्यताय आसा असो भंय पालक उक्तायतात.
मजगतीं,आमदार जीत आरोलकार हांचे कडेन संपर्क केलो तेन्ना तांणी ह्या रस्त्याचें काम रोखडेंच सुरू जातलें अशें सांगलें आनी कामाक कळाव जाल्ल्याचें मान्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
