नेसाय ममता ट्रेडर्सच्या गुदांवाक उजो लागून ३ लाखांचें लुकसाण
भांगरभूंय | प्रतिनिधी
मडगांव, प्रतिनिधी : नेसायचे उद्देगीक वसणुकेंत ममता ट्रेडर्सच्या गुदांवाक काल रातीं लागिल्ल्या उज्याचेर स वरांनी नियंत्रण मेळ्ळां. मडगांव, कुडचडें आनी कुंकळच्या उजो पालोवपी दळाचे २० जवान घडणुके सुवातेर आशिल्ले. ह्या उज्यांत ३ लाखांचें लुकसाण जालें. जाल्यार २० लाखांची मालमत्ता वाटोवपाक उजो पालोवपी जवानांक येस आयलें.
सुशांत कश्यप हांचे हे कंपनीच्या गुदांवाक सोमारा रातचो उजो लागलो. हांगा वेस्ट पेपर आनी पॅकेजिंग कोयर एकठांय जातालो आनी ताचेर परत प्रक्रिया करपा खातीर तो सांगली महाराष्ट्रांत कंपनींत धाडटाले.
गुदांवांत साठोवन दवरिल्लीं कागदां, पुट्टे आनी हेर सामान दवरिल्ले सुवातेर काल रातच्या साडे धा वरांचेर उजो लागलो. उजो लागिल्ल्याची म्हायती मडगांव उजो पालोवपी दळाक मेळटांच जवानांनी रोखडेंच घडणुके सुवातेर येवन उजो पालयलो. एक गाडी उदक मारल्या उपरांत उजो पालोवंक ना, देखून बारा हजार लिटर तांकीची दुसरी गाडी मागयली. तशेंच मजती खातीर कुडचडें आनी कुंकळ्ळेच्या उजो पालोवपी दळाच्या गाडयांक आपयले. कागद, कार्डबोर्ड आनी हेर सामान आशिल्ल्यान उदक मारलें तरी उजो परत पेट्टालो.
सकाळीं साडेचार मेरेन २० जवान घडणुके सुवातेर हाजीर आशिल्ले. तांणी उज्याचेर नियंत्रण मेळयलें. उजो पालोवपी दळाचे अधिकारी गिल सुझा, फ्रान्सिस्को मँडीस, ए. के. वेळीप, एस. पी. देसाय हांचे वांगडा फायर फायटर हाजीर आशिल्ले. उजो पालोवपी दळान दिल्ले म्हायती प्रमाण ह्या उज्यांत सुमार ३ लाखांचें लुकसाण जालें. जाल्यार २० लाखांची मालमत्ता वाटयली. उजो पालोवपा खातीर ४८ हजार लिटर उदक वापरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
