भांगरभूंय | प्रतिनिधी
खंडपिठांत याचिका दाखल
पणजी: रेईश मागूश पंचायतीच्या नव्या पंचायत घराचें हालींच उक्तावण केल्लें. बांदिल्ल्या पंचायत घरा खातीर कसलेच तरेची परवानगी घेतिल्ली ना. ताका लागून पंचायत घर बेकायदो आशिल्ल्याचो दावो करून मुंबय उच्च न्यायालयाच्या गोंय खंडपिठांत याचिका दाखल केली. तातूंत संबंदिताचेर कारवाय करपाची मागणी केल्या.
ह्या प्रकरणांत अॅडवीन फर्नांडीस आनी राजेश दाभोळकार हांणी खंडपिठांत याचिका दाखल केल्या. हातूंत राज्य सरकार, म्हापशें नगर नियोजन खातें, गोंय ग्रामीण विकास यंत्रणा, पंचायत संचालक, रेईश मागूश पंचायत, सरपंच सुस्मीता पेडणेंकार, पंच सुभाष पेडणेंकार, श्रुती चोडणकार, झेवीयर रिबेरो हांचे सयत हेर पंचांक प्रतिवादी केल्यात. ते प्रमाण पंचायत घरा खातीर रेईश मागूश हांगासरल्या सर्वे क्रमांक 1/5 मदले जमनींत बांदलां. ते खातीर कसलेच तरेची परवानगी घेनासतना नेमांचे उल्लंघन करून बांदिल्ल्याचो दावो केला.
तशेंच सदर पंचायत घर दिव्यांगा खातीर अनुकूल ना. तशेंच तळ माळो आनी दोन माळ्याची इमारत बांदपा खातीर परवानगी घेवपाक 2018 वर्सा अर्ज केल्लो. ताका ग्रामीण विकास यंत्रणेन 13 एप्रील 2018 दिसा हरकत घेतली. तशेंच वित्त खात्यान 20 नोव्हेंबर 2017 दिसा जारी केल्ल्या आदेशा प्रमाण, सरकारी बांदकामांक सगल्या यंत्रणाची परवानगी गरजेची आशिल्ल्याचें स्पश्ट केलां. उपरांत पंचायतीन 21 एप्रील 2018 दिसा पंचायत घर बांदपा खातीर नगर नियोजन खात्या कडेन प्रस्ताव सादर केलो. उपरांत खात्यान पंचायत घरा खातीर सेट बॅक एरिया उणी आशिल्ल्याचें स्पश्ट केलें. उपरांत सरपंचान पत्र वेव्हार करून नगर नियोजन विकास मंडळा कडेन प्रस्ताव सादर करून सेट बॅक एरिया सदळ करपाची मागणी केली. ते प्रमाण मंडळान तळ माळो आनी दोन माळ्याची इमारत बांदपा खातीर सेट बॅक एरिया सदळ केली.
अशें आसतना पंचायतीन बेकायदो तळ माळो आनी तीन माळ्याची इमारत बांदली. हाची दखल घेवन याचिकादारांनी खंडपिठांत धांव घेवन बेकायदो बांदकाम मातयेभरवण करपाची मागणी केली. तशेंच संबंदितांचेर कारवाय करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
