भांगरभूंय | प्रतिनिधी
म्हापशें: शारांतल्या चार प्रभागांनी रस्त्यांच्या दुरुस्तींचें काम सुरू जालां. हाचेर 7.5 कोटी रुपया खर्च जातलो. दोन कंत्राटदारा वतीन हें काम जायत आसून ते म्हापशेंकारांक बऱ्या दर्जाचे रस्ते उपलब्ध करून दितले अशें उपसभापती ज्योशुआ डिसोझा हांणी सांगलें.
फाटल्या देड वर्सांत म्हापशें शारांत भुंयगत केबल घालपाचें काम हातांत घेतलां. ताका लागून शारांतल्या रस्त्यांची बाबत स्थिती जाल्ली. हाका लागून थळावे लोक आनी वाहन चालकांक त्रास सोंसचो पडटालो. भुंयगत वाहिन्यांचें काम पुराय जालां. रस्त्याचे दुरुस्तीची मागणी लोक करीत आशिल्ले.
गणेशपुरींत रस्ते दुरुस्ती करून डांबर घालपाच्या कामाचो शुभारंभ उपसभापती ज्योशुआ डिसोझा हांचे हस्तुकीं जालो. ह्या वेळार नगराध्यक्षा प्रिया मिशाळ, उपनगराध्यक्ष विराज फडके, नगरसेविका डॉ. नूतन बिचोलकार, भौशीक बांदकाम खात्याचे अधिकारी आनी थळावे लोक हाजीर आशिल्ले.
रस्त्यांचें काम सुरू करून हांवें म्हजें वचन पाळ्ळां. लोकांक खूबशा गैरसोयींक सामकार वचचें पडलें. हो त्रास सोंशिल्ले खातीर हांव तांचो उपकारी आसां. सद्या चार प्रभागांनी रस्तो दुरुस्तींचें काम सुरू आसा. फुडल्या टप्प्यांत शारांतले हेर रस्ते दुरुस्त करतले अशें डिसोझा हांणी सांगलें.
ह्या वेळार नगराध्यक्षा प्रिया मिशाळ आनी नगरसेविका नूतन बिचोलकार हांणी आपले विचार उक्तायले. भुंयगत वीज वाहिनी प्रकल्पाच्या कामांत सहकार्य केल्ले खातीर लोकांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
