भांगरभूंय | प्रतिनिधी
खंडपिठाचो पंचायत संचालकाक आदेश
मांडवी न्हंयचे देगेर उबारल्यात 21 होर्डिंग्ज
पणजी: पेन्ह द फ्रान्स पंचायत वाठारांत मांडवी न्हंयचे देगेर उबारिल्ले 21 होर्डिंग्ज मातयेभरवण करपाच्या आदेशाक पंचायत संचालकान स्थगिती दिल्या. हाची दखल घेवन मुंबय उच्च न्यायालयाच्या गोंय खंडपिठान पंचायत संचालकाक एका म्हयन्या भितर संबंदीत अर्ज निकालांत काडपाचो आदेश जारी केला. तशेंच हे विशीं गोंय किनारी क्षेत्र वेवस्थापन प्राधिकरणाक (GCZMA) पळोवणी करून अहवाल सादर करपाचो निर्देश जारी केला. जमीन धनयांक नोटीस दिवन 15 डिसेंबर मेरेन प्रतिज्ञापत्र सादर करपाचो आदेशूय पंचायतीक दिला.
गोंयच्या रस्त्याचे कुशींनी तशेंच मांडवी आनी हेर न्हंयांचे देगेर व्हड व्हड होर्डिंग्ज उबारतात. ह्या होर्डिंग्जा खातीर ठोस अशी यंत्रणा नाशिल्ल्यान संबंदीत खंयूय होर्डिंग्ज उबारतात. हाचेर आळो घालपा खातीर खंडपिठान 2007 वर्सा स्वेच्छा दखल याचिका घेतिल्ली. हे विशीं खंडपिठान संबंदितांक वेळावेळार आदेश जारी करून बेकायदो होर्डिंग्जा विशीं कारवाय करपाचे निर्देश जारी केल्ले. ह्या प्रकरणांत खंडपिठाक मजत करपा खातीर ज्येश्ठ वकील एस. डी. लोटलीकार हांची अॅमिकस क्युरी म्हूण नेमणूक केल्या.
ते प्रमाण पेन्ह द फ्रान्स पंचायत वाठारांत मांडवी न्हंयचे देगेर उबारिल्ले होर्डिंग्ज मातयेभरवण करपाचो आदेश जारी केल्लो आसतना ताचेर कांयच कारवाय करूंक नाशिल्ल्याचो मुद्दो अॅमिकस क्युरी तशेंच ज्येश्ठ वकील एस. डी लोटलीकार हांणी खंडपिठांत मांडलो. हे विशीं पंचायतीन जारी केल्ल्या आदेशाक पंचायत संचालकान स्थगिती दिल्ल्याची म्हायती पेन्ह द फ्रान्स पंचायती वतीन अॅड. प्रवीण फळदेसाय हांणी दिली. हाची दखल घेवन खंडपिठान संबंदीत धनयांकूय नोटीस दिवन 15 डिसेंबराक खंडपिठांत प्रतिज्ञापत्र दाखल करपाचो निर्देश जारी केला.
वयल्या निर्देशा बरोबर जीसीझॅडएमए न वयल्या होर्डिंग्जाची पळोवणी करून खंडपिठांत अहवाल सादर करचो असो निर्देशूय खंडपिठान जारी केला. मजगतीं, म्हापशें पालिका वाठारांत उबारिल्ल्या बेकायदो 44 होर्डिंग्जाचे कारवाये संदर्भांत 14 डिसेंबर मेरेन कृती अहवाल सादर करपाचो निर्देश जारी केला. जाल्यार पणजी म्हानगरपालिका वाठारांत आशिल्ले बेकायदो होर्डिंग्ज चार सप्तकांत काडटले अशी म्हायती वरिश्ठ वकील जे. ई. कुएलो हांणी खंडपिठांत दिली. हाची दखल घेवन कृती अहवाल सादर करपाचो निर्देश खंडपिठान दिला. ह्या प्रकरणाची फुडली सुनावणी 15 डिसेंबराक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
