भांगरभूंय | प्रतिनिधी
पेडणें: मोपाच्या मनोहर आंतरराष्ट्रीय विमानतळार ‘क्रॅश फायर टेंडर’ (उजो पालोवपी गाडी) चलोवपी कासारवर्णेची दिशा गोविंद नायक ही गोंयांतलीच न्हय जाल्यार देशांतली पयली उजो पालोवपी गाडी चलोवपी बायल थारल्या. हे खातीर काँग्रेसी वतीन सरचिटणीस अॅड. जितेंद्र गांवकार हांणी तिची भेट घेवन फुलांतुरो भेटोवन परबीं दिलीं.
अॅरपोर्ट रेस्क्यू अॅण्ड फायर फायटींग मळा वयले इतिहासीक कामगिरी खातीर तिचें सगळे कडेन कवतूक जाता. पूण काँग्रेस सोडून खंयच्याच राजकी पक्षान अजून तरी तिची दखल घेवंक ना. काँग्रेसीचे सरचिटणीस अॅड. जितेंद्र गांवकार, पेडणें मतदारसंघाचे गटाध्यक्ष कृष्णा नायक, समाज वावुरपी भास्कर नारुलकार, उदय महाले हांणी दिशाची भेट घेवन तिका परबीं भेटयली. ह्या वेळार तिचो बापूय गोविंद नायक, आवय निकिता नायक आनी घरचीं हाजीर आशिल्लीं.
विमानतळार लागिल्लो उजो पालोवपा खातीर ‘क्रॅश फायर टेंडर’ हें सामकें प्रभावी वाहन यंत्र वापरतात. ही गाडी चलोवपाचें काम फक्त दादलेच करताले. मात, दिशा नायक हांणी ही मक्तेदारी मोडल्या. तिणें पेडणें सयत गोंयचें नांव देशांत वयर काडलां. हे खातीर दिशा कवतुकाक पात्र आसा. ह्या कामा खातीर तिचें कवतुक जावप अपेक्षीत आसा आनी हें काम सगळ्यांत आदीं काँग्रेस पक्षान केलां.
‘क्रॅश फायर टेंडर’ ही गाडी चलोवप म्हणल्यार एक व्हड आव्हान. ह्या यंत्राचो वापर लश्कर वा विमानतळार करतात. उजो पालोवपा खातीर लागपी उदक आनी फेसाळ रसायन व्हड प्रमाणार भरिल्लें आसता. हें वाहन चलोवप धोक्याचें काम. विमानतळार ही गाडी चलोवपा खातीर दिशाची रितसर नेमणूक केल्या.
तामीळनाडूच्या नमक्कल वाठारांत दिशान स म्हयन्यांचें खर प्रशिक्षण घेतलां. तिणें सीएफटी ऑपरेटराचे पुर्तते खातीर गरजेची कुळशटाय मेळयल्या. तिका ‘क्रॅश फायर टेंडर’ चलोवपा खातीर रितसर प्रमाणपत्र दिलां. हे खातीर अशी गाडी चलोवपी दिशा नायक ही भारतांतली पयली बायल थारल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
