भांगरभूंय | प्रतिनिधी
सेव्ह ओल्ड गोवा एक्शन समितीची मागणी
पणजी ः पोरन्या गोंयांतल्या युनेस्को संवसारीक दायज थळां खातीर मुखेल मास्टर प्लॅन तयार करचो अशी मागणी ‘सेव्ह ओल्ड गोवा एक्शन समिती’ हांणी केली. जानेवारी मेरेन ही मागणी मान्य जावंक ना जाल्यार आंदोलन करतले अशी शिटकावणी समितीन दिल्या. शेनवारा आझाद मैदानाचेर समितीच्या वांगड्यांनी आपली स्थिती सादर केली. ह्या संदर्भार पीटर व्हिएगस, फातिमा परेरा, फ्रेडी डायस आनी हेर वांगडी हाजीर आशिल्ले.
संवसारीक दायज स्थळ आसले तरी सरकारान ताचो मुखेल आराखडो तयार करूंक ना. प्रादेशिक आराखड्या प्रमाण ह्या जाग्या भोंवतणी 300 मीटर ‘बफर क्षेत्र’ आसपाक जाय. तरी लेगीत ताची सिमा अजून थारावंक ना. संरक्षण आसून लेगीत ह्या वाठारांत वेगवेगळे प्रकल्प हाडटात अशें पीटर व्हिएगस हांणी सांगलें.
कोयर प्रकल्प, हेली पॅड जाले उपरांत आतां रिसॉर्ट प्रकल्प हाडतात. हाचे भायर हांगा जायती बेकायदेशीर बांदकामा उबारपाक लागल्यात. हांगा कोणूय येवन बांदकाम करता. अशे तरेन हे बेकायदेशीर प्रकल्प चालू उरल्यार कांय वर्सां उपरांत गोंयच्या सायबाचे फेस्त हांगा मनोवपाक मेळचें ना. तशेंच ताचो दायज थळाचो दर्जो वचपाची शक्यताय आसा. देखून एक्स्पोजिशन पयलीं सरकारान मास्टर प्लॅन तयार करप गरजेचें आसा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
