भांगरभूंय | प्रतिनिधी
पणजी, बातमीदार ः आयज AIDS दिसा निमतान पणजी ‘संवसारीक एड्स दीस’ कार्यावळीचें आयोजन केल्लें. राज्यांत अंदूं जानेवारी ते ऑक्टोबर मेरेन 210 एचआयवी पॉझिटिव्ह दुयेंती मेळ्ळ्यात. ह्या काळांत HIV/AIDS लागून 27 जाणांक मरण आयलां, अशी म्हायती राज्य एड्स नियंत्रण संघटणेन हालींच जाहीर केल्ल्या अहवालांत दिल्या. ह्या निमतान भलायकी सचीव अरुण कुमार मिश्रा, संचालिक डॉ. गीता काकोडकार आनी हेर अधिकारी हाजीर आशिल्ले.
अहवाला प्रमाण, एचआयवीची लागण जाल्ल्या 210 दुयेंती मदीं 146 दादले, 61 बायलां आनी 3 तृतीयपंथी आसात. 146 दादल्यां मदीं 25 ते 34 वर्सां पिराय गटांतले 57 दुयेंती आसात. जाल्यार 61 बायलां मदीं 35 ते 49 पिरायेचे सगळ्यांत चड 24 दुयेंती आसात. 14 वर्सां सकयल्या दोग जाणांक आनी 50 वर्सां वयर 33 जाणांक एचआयवीची लागण जाला.
जानेवारी ते ऑक्टोबर ह्या काळांत राज्यांत एड्स दुयेंसाक लागून 27 जाणांक मरण आयलें. हातूंत 18 दादले आनी 9 बायलो आसात. ह्या काळांत 1 लाख 22 हजार 790 रगताचे नमुने तपासणे खातीर आयले. तातूंतले फकत 210 जाणांक एचआयवी जाल्ल्याचे स्पश्ट जाले.
बार्देश तालुक्यांत चड दुयेंती
210 दुयेंतींतले 46 दुयेंती बार्देश तालुक्यांत आसात. ताचे उपरांत सासाश्टी (33), मुरगांव (27), तिसवाडी (26) दुयेंती आसात.
असुरक्षित लैंगिक संबंद हें मुखेल कारण
अहवाला प्रमाण, 210 दुयेंतींतल्या 204 दुयेंतींक (97.1 टक्के) असुरक्षित लैंगिक संबंदातल्यान एचआयवीची लागण जालां. पालकां कडल्यान भुरग्याक संसर्ग जावपाचीं 4 आनी दुषित सुयांक लागून संसर्ग जावपाची 2 प्रकरणां मेळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
